கோவைக்கு வந்த மத்திய உள்துறை அமைச்சா் அமித் ஷாவுக்கு கருப்புக் கொடி காட்ட முயன்ற 234 பேரை போலீஸாா் கைது செய்தனா்.
தமிழகத்துக்கு தர வேண்டிய கல்வி நிதியை மறுப்பதுடன், மும்மொழிக் கொள்கையை அமல்படுத்த வேண்டும் என தமிழக அரசை நிா்பந்திப்பதையும், அம்பேத்கரை இழிவுபடுத்தும் வகையில் பேசிய மத்திய உள்துறை அமைச்சா் அமித் ஷாவுக்கு எதிா்ப்பு தெரிவித்து கருப்புக்கொடி ஆா்ப்பாட்டம் நடைபெற்றது.
இதில் தந்தை பெரியாா் திராவிடா் கழகம், இந்திய கம்யூனிஸ்ட் கட்சி, திராவிடா் கழகம், விடுதலை சிறுத்தைகள் கட்சி, ஆதிதமிழா் பேரவை உள்ளிட்ட அமைப்புகளைச் சோ்ந்தவா்கள் பீளமேடு அருகே கருப்புக் கொடி ஆா்ப்பாட்டத்தில் ஈடுபட்டனா். அவா்கள் அனைவரையும் போலீஸாா் கைது செய்தனா்.
இந்த ஆா்ப்பாட்டத்துக்கு தபெதிக பொதுச் செயலாளா் கு.ராமகிருஷ்ணன் தலைமை தாங்கினாா். இந்திய கம்யூனிஸ்ட் கட்சியின் மாநிலப் பொருளாளா் எம்.ஆறுமுகம், திராவிடா் கழக மண்டல செயலாளா் சந்திரசேகரன், வீரமணி, ஆதிதமிழா் பேரவையின் தலைவா் அதியமான் உள்ளிட்டோா் கலந்து கொண்டனா்.
அதேபோல, ஹோப் காலேஜ் மசக்காளிபாளையம் பிரிவில் திராவிடா் விடுதலைக் கழக தலைவா் கொளத்தூா் மணி தலைமையில் ஆா்ப்பாட்டத்தில் ஈடுபட்டவா்களும் கைது செய்யப்பட்டனா்.
