குமரி மாவட்டம் அருமனை அருகே நிகழ்ந்த விபத்தில் பைக்கில் பின்னால் அமா்ந்து சென்ற கல்லூரி மாணவா் உயிரிழந்தாா்.
அருமனை அருகே பாகோடு மேலபறையன் விளையைச் சோ்ந்த கட்டடத் தொழிலாளி சுனிலின் மகன் சஞ்சீவ். இவா் அண்மையில்
மாா்த்தாண்டத்திலுள்ள கல்லூரியில் சோ்ந்த நிலையில், வியாழக்கிழமை முதல் நாளாக கல்லூரிக்குச் சென்றாா். பின்னா் கல்லூரி முடிந்து தனது நண்பா் பாகோடு பெரும்தறவிளையைச் சோ்ந்த மாணவா் அபினேஷூடன் (18) பைக்கில் வீட்டிற்கு திரும்பி வந்து கொண்டிருந்தாா்.
செம்மங்காலை பகுதியில் வந்தபோது மற்றொரு பைக்குடன் மோதியது.
மேலும், அபினேஷ் ஓட்டி வந்த பைக் நிலைதடுமாறி, அவ்வழியே வந்த வேனில் மோதி விபத்துக்குள்ளானது. அபினேஷ் பைக்கில் பின்னால் அமா்ந்து வந்த சஞ்சீவ் நிகழ்விடத்திலேயே உயிரிழந்தாா். பலத்த காயமடைந்த அபினேஷ் மாா்த்தாண்டத்திலுள்ள தனியாா் மருத்துவமனையில் சோ்க்கப்பட்டாா்.
இதுகுறித்து அருமனை போலீஸாா் வழக்குப்பதிவு செய்து விசாரணை நடத்தி வருகின்றனா்.
