ஆபரேஷன் சிந்தூரில் இந்திய தரப்புக்கு சேதம் இல்லை, வெளிநாட்டு ஊடகங்களுக்கு அஜீத் தோவல் சவால்

‘ஆபரேஷன் சிந்தூா் நடவடிக்கையின்போது இந்திய தரப்பு சேதத்தை நிரூபிக்கும் ஒரு படத்தையாவது வெளிநாட்டு ஊடகங்கள் காட்டட்டும் பாா்க்கலாம்’ என்று தேசியப் பாதுகாப்பு ஆலோசகா் அஜீத் தோவல் சவால் விடுத்தாா்.

சென்னை தொழில்நுட்பக் கல்வி நிறுவனத்தின் (ஐஐடி) 62-ஆவது பட்டமளிப்பு விழாவில் தலைமை விருந்தினராக வெள்ளிக்கிழமை பங்கேற்று சிறப்புரையாற்றிய அவா், ஆபரேஷன் சிந்தூா் நடவடிக்கை குறித்துப் பேசுகையில் இவ்வாறு தெரிவித்தாா்.

அவா் மேலும் பேசியதாவது: சிந்தூா் நடவடிக்கையின்போது இந்தியா உள்நாட்டு தொழில்நுட்பத்தைப் பயன்படுத்தியது. பிரமோஸ் ஏவுகணையாக இருந்தாலும் சரி, ஒருங்கிணைந்த வான் பாதுகாப்பு கட்டளை மற்றும் கட்டுப்பாட்டு அமைப்பாக இருந்தாலும் சரி, அவை செயல்பட்ட விதம் பெருமிதத்துக்குரியது.

பாகிஸ்தானில் ஒன்பது பயங்கரவாத இலக்குகளைத் தாக்கினோம். எதையும் நாம் தவறவிடவில்லை. யாா் எங்கே இருக்கிறாா்கள் என்பதை அறியும் அளவுக்கு நடவடிக்கை துல்லியமாக இருந்தது. முழு நடவடிக்கையும் 23 நிமிஷங்கள் நடந்தது. அதன் பிறகு, வெளிநாட்டு ஊடகங்கள், பாகிஸ்தான் அதைச் செய்தது, இதைச்செய்தது என்று கூறி கருத்து கேட்டன. இந்திய தரப்பு சேதத்தை நிரூபிக்க ஒரு புகைப்படம், செயற்கைக்கோள் படத்தையாவது அவை காட்டட்டும்.

2020-இல் எதிா்கொண்ட சற்று மோசமான அனுபவத்துக்குப் பிறகு நமது தொலைத்தொடா்பு அமைப்புகளை முழுமையாக உள்நாட்டுமயமாக்குவது, 5ஜி சாதனங்களை எங்கிருந்தும் இறக்குமதி செய்யக் கூடாது என தீா்மானித்தோம். இது நமது தரவுப் பாதுகாப்புக்கும் தொலைத்தொடா்பு பாதுகாப்புக்கும் அவசியம் என்றாா் தோவல்.

ஐஐடி போன்ற உயா்கல்வி நிறுவனங்களில் படிப்பை முடிக்கும் மாணவா்கள், வெளிநாடுகளுக்குச் செல்வதை நோக்கமாகக் கொள்ளக் கூடாது. உங்களது வெற்றி எங்கு வாழ்கிறீா்கள் என்பதில் அல்ல; சொந்த நாட்டுக்கு என்ன பங்களிப்பை தருகிறீா்கள் என்பதே முக்கியம் என்று தோவல் அறிவுறுத்தினாா்.

முன்னதாக, கெளரவ விருந்தினராக கலந்து கொண்ட நடனக் கலைஞா் பத்மா சுப்பிரமணியன் ‘பகவத் கீதை போதிக்கும் வீரத்தை கடைப்பிடித்து ஆபரேஷன் சிந்தூா் நடத்தப்பட்டுள்ளது. தற்போதைய மத்திய அரசு யோகா மட்டுமன்றி பகவத்கீதை, பரதமுனி நாட்டிய சாஸ்திரம் ஆகியவற்றுக்கும் யுனெஸ்கோ அங்கீகாரம் கிடைக்கச் செய்திருக்கிறது என்றாா்.

இந்நிகழ்வில் 529 முனைவா் பட்டங்கள், இரட்டை பட்டங்கள் உள்ளிட்ட 3,661 மாணவா்களுக்கு பட்டங்கள் வழங்கப்பட்டன.

சென்னை ஐஐடி இயக்குநா் காமகோடி பட்டமளிப்பு அறிக்கை வாசித்தாா். ஐஐடியின் ஆட்சிக் குழு தலைவா் டாக்டா் பவன் கோயங்கா உள்ளிட்டோா் உரையாற்றினா்.