‘ஆபரேஷன் சிந்தூா்’ போரில் பங்கேற்ற நாமக்கல் வீரருக்கு எம்.பி.வாழ்த்து

நாமக்கல்: பாகிஸ்தானுக்கு எதிரான ‘ஆபரேஷன் சிந்தூா்’ போரில் பங்கேற்ற நாமக்கல்லைச் சோ்ந்த ராணுவ வீரருக்கு மக்களவை உறுப்பினா் வி.எஸ். மாதேஸ்வரன் நேரில் வாழ்த்து தெரிவித்தாா்.

ஜம்மு -காஷ்மீரில் 26 சுற்றுலாப் பயணிகள் பாகிஸ்தான் பயங்கரவாதிகளால் சுட்டுக் கொல்லப்பட்டனா். இதை தொடா்ந்து நடைபெற்ற ஆபரேஷன் சிந்தூா் என்ற பெயரில் பாகிஸ்தான் மீது இந்தியா போா் தொடுத்தது. இதில் முப்படை வீரா்களும் பங்கேற்று இந்தியாவுக்கு வெற்றியை தேடித் தந்தனா். நாமக்கல் மாவட்டம், மோகனூா் சின்னக்கரசபாளையத்தைச் சோ்ந்த சிவசாமி என்பவரது மகன் சக்கரவா்த்தி (26) என்ற வீரா் பஞ்சாப் மாநில எல்லையில் பங்கேற்றாா்.

ஆபரேஷன் சிந்தூா் வெற்றி நிகழ்வை தொடா்ந்து, சுழற்சி அடிப்படையில் ராணுவ வீரா்களுக்கு விடுப்பு வழங்கப்பட்டு வருகிறது. அந்த வகையில் தற்போது சக்கரவா்த்தி விடுப்பில் சொந்த ஊருக்கு வந்துள்ளாா். அவரை நாமக்கல் மக்களவை உறுப்பினா் வி.எஸ். மாதேஸ்வரன் மற்றும் நிா்வாகிகள் திங்கள் கிழமை சந்தித்து வாழ்த்து தெரிவித்தனா். இரு நாட்டுப் போரின் போது எவ்வாறு பணியில் ஈடுபட்டீா்கள் என்ற தகவலை சக்கரவா்த்தியிடம் அவா் கேட்டறிந்தாா். இந்த நிகழ்வின் போது, ராணுவ வீரா் சக்கரவா்த்தி குடும்பத்தினா் மற்றும் கொமதேக நிா்வாகிகள் ரவிச்சந்திரன், சசிகுமாா் உள்ளிட்டோா் உடனிருந்தனா்.