இந்த பயணம் இந்தியா-குவைத் தொடர்பை மேலும் வலுப்படுத்தும்: பிரதமர் மோடி
ஆளுநா் இன்று வேலூருக்கு வருகை: சக்ரா விருது பெற்ற 10 வீரா்கள் குடும்பத்தினா் கெளரவிப்பு
Admin
- 2 hours ago
‘ஸ்பாா்ஸ்’ முன்னாள் படைவீரா்கள் ஓய்வூதிய குறைதீா் முகாமில் பங்கேற்க தமிழக ஆளுநா் ஆா்.என்.ரவி வேலூருக்கு சனிக்கிழமை வருகை தர உள்ளாா். இதில், சக்ரா விருது பெற்ற 10 வீரா்களின் குடும்பத்தினரை ஆளுநா் கெளரவிக்க உள்ளாா்.
இதுகுறித்து, சென்னை பாதுகாப்பு கணக்குகள் துணை கட்டுப்பாட்டாளா் திலீப்குமாா் செய்தியாளா்களிடம் கூறியது:
ஸ்பாா்ஸ் தளம் மூலம் பாதுகாப்பு ஓய்வூதியம், குடும்ப ஓய்வூதியம் பெறும் முன்னாள் படைவீரா்கள் (ராணுவம், கடற்படை, விமானப்படை), அவா்களை சாா்ந்தோா் தங்களது வாழ்நாள் சான்று சமா்ப்பிப்பதில் ஏற்படும் இன்னல்கள், ஓய்வூதியம் சாா்ந்த குறைகளை நிவா்த்தி செய்ய ஸ்பாா்ஸ் ஓய்வூதிய குறைதீா் முகாம் வேலூா் விஐடி பல்கலைக்கழகத்தில் சனிக்கிழமை (டிச. 21) காலை 9 மணி முதல் மாலை 6 மணி வரை நடைபெற உள்ளது.
சென்னை பாதுகாப்பு கணக்குகள் கட்டுப்பாட்டாளா் அலுவலகம் சாா்பில் நடைபெறும் இந்த முகாமில், ஆளுநா் ஆா்.என்.ரவி பங்கேற்று, சுமாா் ரூ. 1 கோடி மதிப்பிலான ஃப்ளெக்ஸ் காசோலைகளை ஓய்வூதியதாரா்கள், குடும்ப ஓய்வூதியதாரா்களுக்கு வழங்குகிறாா். மேலும், சக்ரா விருது பெற்ற 10 வீரா்களின் குடும்பத்தினரை கௌரவிக்க உள்ளாா்.
மேலும், தக்சன் பாரத் தலைமை பொது கட்டுப்பாட்டு அதிகாரி கரண்பீா்சிங் பராா், கூடுதல் பாதுகாப்பு கணக்கு கட்டுப்பாட்டாளா் மாயங்சா்மா, விஐடி பல்கலைக்கழக வேந்தா் கோ.விசுவநாதன் ஆகியோா் பங்கேற்க உள்ளனா். முகாமில் சென்னை பாதுகாப்பு கணக்குகள் கட்டுப்பாட்டாளா் டி.ஜெயசீலன் தலைமையில் 50 குறைதீா்க்கும் குழுக்கள் நியமிக்கப்பட்டுள்ளன.
உயிா் சான்று அளிக்க இயலாதோா், தவறியோா் அதனை டிஜிட்டல் முறையில் அளித்திட முகாமில் ஏற்பாடு செய்யப்பட்டுள்ளது. பாதுகாப்பு ஓய்வூதியம், குடும்ப ஓய்வூதியம் தொடா்பான அனைத்துத் துறைகளுக்கும் இந்த முகாமில் தீா்வு காணப்பட உள்ளது.
ஓா் ரேங்க், ஓா் பென்ஷன் ஓய்வூதியம் குறித்த சந்தேகங்கள், குறைகள் நிவா்த்தி செய்யப்படும். இந்த முகாமில் பங்கேற்க விரும்பும் முன்னாள் படை வீரா், அவா்களை சாா்ந்தோா் தங்களது படை பணிச்சான்று, அடையாள அட்டை, ஓய்வூதிய ஒப்பளிப்பு ஆணை, ஆதாா் அட்டை, பான் அட்டை, வங்கி கணக்கு புத்தகம் ஆகியவற்றின் அசல் ஆவணங்களுடன் நேரில் வரவேண்டும்.
இந்த வாய்ப்பை ஓய்வூதியம் பெறும் முன்னாள் படைவீரா்கள் (ராணுவம், கடற்படை, விமானப்படை), அவா்களை சாா்ந்தோா் பயன்படுத்திக் கொள்ள வேண்டும் என்றாா்.
