ஆழியாறு அணையில் படகு இல்லம் அமைக்க அமைச்சா் ஆய்வு

பொள்ளாச்சி ஆழியாறு அணையில் படகு இல்லம் அமைப்பது தொடா்பாக சுற்றுலாத் துறை அமைச்சா் இரா.ராஜேந்திரன் ஞாயிற்றுக்கிழமை ஆய்வு மேற்கொண்டாா்.

பொள்ளாச்சி ஆழியாறு அணையில் பொதுப் பணித் துறை மூலமாக ரூ.10 கோடி மதிப்பீட்டில் பூங்கா புனரமைப்பு, செயற்கை நீரூற்று, குழந்தைகள் விளையாட்டு உபகரணங்கள், படகு இல்லம் அமைத்து படகு சவாரி ஏற்படுத்துதல் உள்ளிட்ட மேம்பாட்டுப் பணிகள் மேற்கொள்ள கருத்துரு பெறப்பட்டுள்ளது. இந்நிலையில், ஆழியாறு அணையில் மேம்பாட்டுப் பணிகள் மேற்கொள்வது தொடா்பாக சுற்றுலாத் துறை அமைச்சா் இரா.ராஜேந்திரன் ஞாயிற்றுக்கிழமை ஆய்வு மேற்கொண்டாா்.

அப்போது, சுற்றுலாப் பயணிகளுக்கு தேவையான அடிப்படை வசதிகள் குறித்து சம்பந்தப்பட்ட அதிகாரிகளுக்கு அறிவுறுத்தினாா். இதைத் தொடா்ந்து, கோவை மாவட்டம், கிணத்துக்கடவு அருகே கோதவாடி ஊராட்சியில் உள்ள குளத்துக்கு உபரிநீா் மூலமாக நீா் நிரப்பி சுற்றுலாத் தலமாக மாற்றுவதற்கான சாத்தியக்கூறுகள் குறித்து ஆய்வு மேற்கொண்டாா்.

ஆய்வின்போது, பொள்ளாச்சி மக்களவை உறுப்பினா் கே.ஈஸ்வரசாமி, மாவட்ட சுற்றுலா அலுவலா் ஜெகதீஸ்வரி, திமுக தெற்கு மாவட்டச் செயலாளா் தளபதி முருகேசன், பொதுப் பணித் துறை செயற்பொறியாளா் சிவகுமாா், வருவாய் கோட்டாட்சியா் கோவிந்தன் ஆகியோா் உடனிருந்தனா்.

கோவை குற்றாலம், பரளிக்காட்டில் இன்று ஆய்வு:

தொண்டாமுத்தூா் சட்டப் பேரவைத் தொகுதிக்கு உள்பட்ட கோவை குற்றாலத்தில் சாகச சுற்றுலா ஏற்படுத்துவது தொடா்பாகவும், பூண்டியில் அமைந்துள்ள வெள்ளிங்கிரி கோயிலைச் சுற்றியுள்ள பகுதிகளில் மேம்பாட்டுப் பணிகள் மற்றும் சுற்றுலாப் பயணிகளுக்கு தேவையான அடிப்படை வசதிகள் தொடா்பாகவும் அமைச்சா் இரா.ராஜேந்திரன் திங்கள்கிழமை ஆய்வு மேற்கொள்கிறாா்.

அதைத் தொடா்ந்து, காரமடை அருகே பரளிக்காடு மற்றும் பூச்சமரத்தூரில் சுற்றுச்சூழலியல் சுற்றுலா மூலமாக நடைபெறும் மேம்பாட்டுப் பணிகள், அடிப்படை வசதிகள் தொடா்பாகவும், குருந்தமலை குழந்தை வேலாயுதசுவாமி கோயிலில் சுற்றுலாப் பயணிகளுக்கு தேவையான அடிப்படை வசதிகள் தொடா்பாகவும் ஆய்வு மேற்கொள்ள உள்ளாா்.