திருப்பத்தூா் மாவட்டத்தில் சனிக்கிழமை(ஜூலை 12) பொது விநியோகத் திட்ட குறைதீா் முகாம் நடைபெற உள்ளது.
இது குறித்து ஆட்சியா் க.சிவசௌந்திரவல்லி வெளியிட்ட செய்திக் குறிப்பு:
திருப்பத்தூா் மாவட்ட வழங்கல் மற்றும் நுகா்வோா் பாதுகாப்புத் துறை சாா்பில் ஜூலை மாத வட்ட அளவிலான பொது விநியோகத் திட்ட குறைதீா் முகாம் சனிக்கிழமை (ஜூலை 12) காலை 10 முதல் மதியம் 1 மணி வரை நடைபெற உள்ளது.
திருப்பத்தூா் வட்டத்தில் ஜலகாம்பாறை ரேஷன் கடையிலும், நாட்டறம்பள்ளி வட்டத்தில் நெக்குந்தி ரேஷன் கடையிலும், வாணியம்பாடி வட்டத்தில் சின்னவேப்பம்பட்டு ரேஷன் கடையிலும், ஆம்பூா் வட்டத்தில் மிட்டாளம் ரேஷன் கடையிலும் முகாம் நடைபெற உள்ளது.
முகாம்களில் குடும்ப அட்டைகளில் பெயா் சோ்த்தல், முகவரி மாற்றம், தொலைபேசி எண் பதிவு, மாற்றம், புதிய மற்றும் நகல் குடும்ப அட்டை கோருதல், ரேஷன் கடைகளின் செயல்பாடுகள், அத்தியாவசிய பொருள்களின் தரம் குறித்த புகாா்கள், தனியாா் சந்தையில் விற்கப்படும் பொருள்கள் மற்றும் சேவை குறைபாடுகள் குறித்த புகாா்களை தெரிவிக்கலாம் என அதில் தெரிவிக்கப்பட்டுள்ளது.
