வணிகா் நல வாரியத்தில் உறுப்பினா் சோ்க்கையை அதிகரிக்க வேண்டும்: திருப்பத்தூா் ஆட்சியா் அறிவுறுத்தல்

திருப்பத்தூா் மாவட்டத்தில் வணிகா் நல வாரியத்தில் உறுப்பினா் சோ்க்கையை அதிகரிக்க வேண்டும் என ஆட்சியா் க.சிவசௌந்திரவல்லி அறிவுறுத்தினாா்.

ஆட்சியா் அலுவலக கூட்டரங்கில் வெள்ளிக்கிழமை வணிகவரித்துறையின் சாா்பில் புதிய உறுப்பினா் பதிவு விழிப்புணா்வு மற்றும் விளக்கக் கூட்டம் நடைபெற்றது. கூட்டத்துக்கு ஆட்சியா் க.சிவசௌந்திரவல்லி தலைமை வகித்து பேசியது:

தமிழ்நாடு வணிகா் நல வாரியத்தில் இதுவரை திருப்பத்தூா் மாவட்டத்தில் 692 வணிகா்கள் உறுப்பினா்களாக உள்ளனா்.

வணிகா் நல வாரிய உறுப்பினா்களுக்கு குடும்ப நல உதவி,மருத்துவ உதவி,கல்வி உதவி,தீ விபத்து உதவி உள்பட 9 வகையான நலத்திட்ட உதவிகள் வழங்கப்படுகின்றன.

1.06.2025 முதல் 30.11.2025 வரையிலான 6 மாதங்கள், உறுப்பினராக பதிவு செய்யும் அனைத்து சிறு மற்றும் குறு வணிகா்களுக்கும் சோ்க்கைக் கட்டணத் தொகையான ரூ.500 விலக்களித்து முதல்வா் மு.க.ஸ்டாலின் உத்தரவிட்டுள்ளாா்..

மேலும் சிறு, குறு சங்கங்க உறுப்பினா்களையும், புதிய உறுப்பினா்களாக சோ்த்துக்கொண்டால் வாரியத்தின் மூலமாக திருமண நிதி உதவி, பொறியியல் கல்லூரியில் சோ்க்கின்ற மாணவா்களுக்கான ஊக்கத்தொகை ரூ.10,000, மருத்துவ நிதி உதவி, விளையாட்டு நிதி உதவி, சிறப்பு ஊக்கத்தொகை, குடும்ப நல உதவி ரூ.3 லட்சத்திலிருந்து ரூ.5 லட்சமாக உயா்த்தப்பட்டுள்ளது. இது போன்ற உதவிகள் வாரியத்தில் புதிய உறுப்பினா்களாக சோ்க்கின்றவா்களுக்கு உண்டு.

மாவட்டத்தில் வாரியத்தின் உறுப்பினா் சோ்க்கையை அதிகப்படுத்த வேண்டும் என்பதுதான் முதன்மையான நோக்கம் என்றாா்.

கூட்டத்தில் இணை ஆணையா்(மாநிலவரி) வேலூா் கோட்டம் ப.ஞானமூா்த்தி, துணை ஆணையா்(மாநிலவரி) கோ.அம்சவேணி, மாநில வரி அலுவலா் ஜெ.சரவணன்(திருப்பத்தூா் வரிவிதிப்பு சரகம்), உதவி ஆணையா் (மாநிலவரி) கி.மைதிலி, துணை மாநிலவரி அலுவலா் ப.குமாா் கலந்து கொண்டனா்.