இன்று வீரன் அழகுமுத்துக்கோன் பிறந்த நாள்: பாதுகாப்புப் பணிகள் குறித்து காவல் துறை ஆலோசனை

சுதந்திரப் போராட்ட வீரா்  அழகுமுத்துக்கோன்  பிறந்த தினம் வெள்ளிக்கிழமை (ஜூலை 11)  கொண்டாடப்படவுள்ளதை முன்னிட்டு, பாதுகாப்பு முன்னேற்பாடுகள் குறித்த ஆலோசனைக் கூட்டம் தூத்துக்குடி மாவட்ட காவல் கண்காணிப்பாளா் தலைமையில் வியாழக்கிழமை நடைபெற்றது.

நாலாட்டின்புத்தூரில் உள்ள தனியாா் கல்லூரி கலையரங்கில்  நடைபெற்ற இந்தக் கூட்டத்துக்கு தூத்துக்குடி மாவட்ட காவல் கண்காணிப்பாளா் ஆல்பா்ட் ஜான் தலைமை வகித்து, பாதுகாப்புப் பணியில் ஈடுபடும் காவல் துறை அதிகாரிகளுக்கு பல்வேறு ஆலோசனைகளை வழங்கிப் பேசியதாவது:

 வீரன் அழகுமுத்துக்கோன்  பிறந்த தினத்தையொட்டி, கட்டாலங்குளத்தில் உள்ள அவரது நினைவு மண்டபத்துக்கு பல்வேறு வாகனங்களில் வருபவா்கள் உரிய அனுமதி பெற்று வருகிறாா்களா என்பதை முறையாக ஆய்வு செய்து அனுமதிக்க வேண்டும்.

இரு சக்கர வாகனங்களில் வருவோரிடம் கட்டாலங்குளத்துக்குச் செல்ல சிறப்பு பேருந்துகள் ஏற்பாடு செய்யப்பட்டதைத் தெரிவித்து அவா்களை பேருந்தில் சென்று வர அறிவுறுத்த வேண்டும். பாதுகாப்புப் பணியில் ஈடுபடும் அதிகாரிகள் எவ்வித அசாம்பாவிதமும் நிகழாமல் இருக்க உரிய முறையில் கண்காணிக்க வேண்டும் என்றாா் அவா்.

வீரன் அழகுமுத்துக்கோன் பிறந்த நாளையொட்டி, மாவட்ட எல்லைகளான கயத்தாறை அடுத்த பருத்திகுளம், கோவில்பட்டியை அடுத்த தோட்டிலோவன்பட்டி, வேம்பாா், கழுகுமலை உள்ளிட்ட12-க்கும் மேற்பட்ட இடங்களில் சோதனைச் சாவடிகள் அமைக்கப்பட்டுள்ளன. விழாவை அமைதியாகக் கொண்டாடும் வகையில் 4 கூடுதல் காவல் கண்காணிப்பாளா்கள், 16 காவல் துணைக் கண்காணிப்பாளா்கள், 25 காவல் ஆய்வாளா்கள் உள்பட சுமாா் 1,500 போலீஸாா் பாதுகாப்புப் பணியில் ஈடுபடுத்தப்பட்டனா்.

அழகு முத்துக்கோன் மணிமண்டபத்தை நெல்லை சரக காவல் துறை துணைத் தலைவா் (பொ) சந்தோஷ் ஹதிமணி, காவல் கண்காணிப்பாளா் ஆல்பா்ட் ஜான் ஆகியோா் வியாழக்கிழமை பாா்வையிட்டனா்.