இறப்பில் சந்தேகம் எனக்கூறி உறவினா்கள் போராட்டம்

கும்பகோணம் அருகே கூலித் தொழிலாளி உயிரிழப்பில் சந்தேகம் எனக் கூறி அவரது உடலை அடக்கம் செய்ய மறுத்து உறவினா்கள் புதன்கிழமை போராட்டத்தில் ஈடுபட்டனா்.

தஞ்சாவூா் மாவட்டம், பட்டீஸ்வரம் காவல் நிலைய எல்லைக்குட்பட்ட மணப்படையூரைச் சோ்ந்தவா் தா்மராஜ் (38). இவரது மனைவி சங்கீதா. இவா்களுக்கு 2 பெண், 1 ஆண் பிள்ளைகள் உள்ளனா். கடந்த பிப் 2-இல் தா்மராஜ் மதுகுடித்துவிட்டு உறங்கியவா் மறுநாள் உயிரிழந்துகிடந்தாா். இதுகுறித்து பட்டீஸ்வரம் போலீஸாா் வழக்கு பதிந்து உடற்கூறாய்வுக்குப் பின்னா் உறவினா்களிடம் சடலத்தை ஒப்படைத்தனா்.

சடலத்தைப் பெற்றுக்கொண்ட உறவினா்கள் தா்மராஜ் இறப்பில் சந்தேகம் உள்ளதாகத் தெரிவித்து செவ்வாய்க்கிழமை முழுவதும் சடலத்தை வீட்டில் வைத்திருந்தனா். தொடா்ந்து, புதன்கிழமை திருவலஞ்சுழி - தஞ்சாவூா் பிரதான சாலையில் குவிந்து போராட்டத்தில் ஈடுபட்டனா். அவா்களிடம் சுவாமிமலை மற்றும் பட்டீஸ்வரம் போலீஸாா் பேச்சுவாா்த்தை நடத்தியதில் உறவினா்கள் புதன்கிழமை மாலை சடலத்தை எடுத்துச் சென்று அடக்கம் செய்தனா். சடலத்தை அடக்கம் செய்யாமல் ஒருநாள் வீட்டில் வைத்து போராட்டம் நடத்தியதால் அப்பகுதியில் பரபரப்பு ஏற்பட்டது.