இலவச பயிற்சி வகுப்பு மூலம் அரசுப் பணியில் சோ்ந்த 9 பேருக்கு ஆட்சியா் பாராட்டு

ராணிப்பேட்டை மாவட்டத்தில் போட்டித் தோ்வுகளுக்கான இலவச பயிற்சி வகுப்பில் பயின்று அரசு பணியில் சோ்ந்த 9 பேருக்கு ஆட்சியா் ஜெ.யு.சந்திரகலா பாராட்டு தெரிவித்துள்ளாா்.

ராணிப்பேட்டை மாவட்ட வேலைவாய்ப்பு மற்றும் பயிற்சித்துறை, மாவட்ட வேலை வாய்ப்பு மற்றும் தொழில்நெறி வழிகாட்டும் மையம் கடந்த 2022 ஆண்டு முதல் செயல்பட்டு வருகிறது. இந்த கட்டணமில்லா பயிற்சி வகுப்பில் ராணிப்பேட்டை மற்றும் சுற்று வட்டார பகுதியில் உள்ள போட்டித் தோ்வுக்கு தயாராகும் மாணவ, மாணவிகள் பயன்று வருகின்றனா்.

தன்னாா்வ பயிலும் வட்டம் மூலம் சென்னை தலைமை அலுவலகத்தின் மூலம் தோ்ந்தெடுக்கப்பட்ட பயிற்றுநா்களைக் கொண்டு வகுப்புகள் நடைபெறுகின்றன. தன்னாா்வ பயிலும் வட்டத்தின் சாா்பாக செயல்படும் நூலகத்தில் 1,200 க்கு மேற்பட்ட போட்டித் தோ்வுக்கான புத்தகங்கள் மற்றும் மாதிரி வினா தாள்கள் உள்ளன. ஒவ்வொரு சனிக்கிழமையும் முழு மாதிரி தோ்வு நடைபெறுகிறது.

மாவட்ட வேலை வாய்ப்பு அலுவலகத்தின் மூலமாக செயல்படுகின்ற தன்னாா்வ பயிலும் வட்டத்தில் செயல்படும் கட்டணமில்லா பயிற்சி வகுப்பில் இதுவரை 810 மாணவ மாணவிகள் கலந்து கொண்டு பயன் பெறுகின்றனா்.

இந்த நிலையில், இலவச பயிற்சி வகுப்பில் பயின்று அரசு துறைகளில் பணியில் சோ்ந்துள்ள 9 போ் மாவட்ட ஆட்சியா் ஜெ.யு.சந்திரகலா வை சந்தித்தனா். அவா்களுக்கு ஆட்சியா் நினைவுப் பரிசுகளை வழங்கி பாராட்டினாா். நியமன ஆணைகள் கிடைக்கப் பெற்றவா்கள் தமிழக முதல்வருக்கும் நன்றி தெரிவித்தனா்.