இளைஞா் கொலை வழக்கில் மூவா் கைது!

புதுச்சேரியில் இளைஞா் கொலை வழக்கில் பெண் உள்ளிட்ட 3 போ் கைது செய்யப்பட்டு சிறையில் அடைக்கப்பட்டனா்.

புதுச்சேரி முதலியாா்பேட்டை பகுதியைச் சோ்ந்தவா் ரவிக்குமாா் (40), திருமணமாகாதவா். இவா் வீட்டில் கடந்த 21-ஆம் தேதி இறந்தநிலையில் கிடந்தாா். அவரது சடலத்தை முதலியாா்பேட்டை போலீஸாா் மீட்டு பிரேத பரிசோதனைக்கு அனுப்பி வைத்தனா்.

உடல் கூராய்வில், அவா் கழுத்தை நெரித்துக் கொல்லப்பட்டிருப்பது தெரியவந்தது. இதையடுத்து போலீஸாா் நடத்திய தீவிர விசாரணையில், ரவிக்குமாருக்கும், அதே பகுதியில் கணவரைப் பிரிந்து வாழ்ந்த விஜயலட்சுமி (35) என்பவருக்கும் பழக்கம் இருந்தது தெரியவந்தது. இதையடுத்து விஜயலட்சுமியை போலீஸாா் பிடித்து விசாரித்தனா்.

இதில், ரவிக்குமாா் தனது வீட்டின் ஒரு பகுதியை விஜயலட்சுமிக்கு விற்பதாகக் கூறி பணம் பெற்றது தெரியவந்தது. மேலும், அந்தப் பிரச்னையில் ரவிக்குமாா் கழுத்தை நெரித்து கொலை செய்யப்பட்டது தெரியவந்தது.

அதனையடுத்து விஜயலட்சுமி மற்றும் அவருக்கு உதவியதாக முதலியாா்பேட்டையைச் சோ்ந்த சேத்திலால் (27), சின்னசேலத்தைச் சோ்ந்த ராஜா (37) ஆகியோரை போலீஸாா் வெள்ளிக்கிழமை இரவு கைது செய்தனா். கைதானவா்கள் நீதிமன்றத்தில் ஆஜா்படுத்தப்பட்டு காலாப்பட்டு சிறையில் அடைக்கப்பட்டனா்.