ஜஸ்பிரித் பும்ரா, டிரெண்ட் போல்ட் அசத்தல் பந்துவீச்சு; மும்பை அபார வெற்றி!

லக்னௌ சூப்பர் ஜெயண்ட்ஸுக்கு எதிரான போட்டியில் மும்பை இந்தியன்ஸ் 54 ரன்கள் வித்தியாசத்தில் அபார வெற்றி பெற்றது.

ஐபிஎல் தொடரில் மும்பை வான்கடே திடலில் நடைபெற்ற இன்றையப் போட்டியில் மும்பை இந்தியன்ஸ் மற்றும் லக்னௌ சூப்பர் ஜெயண்ட்ஸ் அணிகள் விளையாடின. இந்தப் போட்டியில் டாஸ் வென்ற லக்னௌ அணி பந்துவீச்சைத் தேர்வு செய்ய, மும்பை இந்தியன்ஸ் முதலில் விளையாடியது.

இதையும் படிக்க: பிரியன்ஷ் ஆர்யாவுக்கு முன்னாள் இந்திய வீரர் பாராட்டு!

ரிக்கல்டான், சூர்யகுமார் அரைசதம் விளாசல்

முதலில் விளையாடிய மும்பை இந்தியன்ஸ் நிர்ணயிக்கப்பட்ட 20 ஓவர்களின் முடிவில் 7 விக்கெட்டுகளை இழந்து 215 ரன்கள் எடுத்தது. அந்த அணியில் தொடக்க ஆட்டக்காரர்களாக ரோஹித் சர்மா மற்றும் ரியான் ரிக்கல்டான் களமிறங்கினர். கடந்த இரண்டு போட்டிகளில் அதிரடியாக விளையாடிய ரோஹித் சர்மா 12 ரன்களில் ஆட்டமிழந்தார். இதனையடுத்து, ரிக்கல்டான் மற்றும் வில் ஜாக்ஸ் இருவரும் ஜோடி சேர்ந்தனர். ரிக்கல்டான் அதிரடியாக விளையாடி ரன்கள் குவித்தார்.

அதிரடியாக விளையாடிய ரிக்கல்டான் 32 பந்துகளில் 58 ரன்கள் எடுத்து ஆட்டமிழந்தார். அதில் 6 பவுண்டரிகள் மற்றும் 4 சிக்ஸர்கள் அடங்கும். வில் ஜாக்ஸ் 29 ரன்களில் ஆட்டமிழந்தார். சூர்யகுமார் யாதவ் களமிறங்கியது முதலே அதிரடியில் மிரட்டினார். அதிரடியாக விளையாடிய அவர் 28 பந்துகளில் 54 ரன்கள் எடுத்து ஆட்டமிழந்தார். அதில் 4 பவுண்டரிகள் மற்றும் 4 சிக்ஸர்கள் அடங்கும். திலக் வர்மா 6 ரன்களிலும், கேப்டன் ஹார்திக் பாண்டியா 5 ரன்களிலும் ஆட்டமிழந்தனர். இறுதிக்கட்டத்தில் அதிரடி காட்டிய நமன் திர் 25 ரன்களும், கார்பின் போஸ்ச் 20 ரன்களும் எடுத்தனர்.

லக்னௌ சூப்பர் ஜெயண்ட்ஸ் தரப்பில் மயங்க் யாதவ் மற்றும் ஆவேஷ் கான் தலா இரண்டு விக்கெட்டுகளை கைப்பற்றினர். பிரின்ஸ் யாதவ், திக்வேஷ் ரதி மற்றும் ரவி பிஷ்னோய் தலா ஒரு விக்கெட்டினைக் கைப்பற்றினர்.

பும்ரா, போல்ட் அசத்தல்; மும்பை அபார வெற்றி

216 ரன்கள் எடுத்தால் வெற்றி என்ற இலக்கை நோக்கி விளையாடிய லக்னௌ சூப்பர் ஜெயண்ட்ஸ் 20 ஓவர்களின் முடிவில் 161 ரன்கள் எடுத்து ஆட்டமிழந்தது. இதன் மூலம் மும்பை இந்தியன்ஸ் அணி 54 ரன்கள் வித்தியாசத்தில் அபார வெற்றி பெற்றது.

இதையும் படிக்க: இவர்கள் மூவரும் இங்கிலாந்துக்கு சவாலளிப்பார்கள்; ரவி சாஸ்திரி கூறுவதென்ன?

லக்னௌ அணியில் அதிகபட்சமாக ஆயுஷ் பதோனி 22 பந்துகளில் 35 ரன்கள் எடுத்தார். அதில் 2 பவுண்டரிகள் மற்றும் 2 சிக்ஸர்கள் அடங்கும். அவரைத் தொடர்ந்து, மிட்செல் மார்ஷ் 34 ரன்களும், நிக்கோலஸ் பூரன் 27 ரன்களும் எடுத்தனர். டேவிட் மில்லர் 24 ரன்கள் எடுத்தார். மற்ற வீரர்கள் யாரும் பெரிதாக ரன்கள் குவிக்கவில்லை.

மும்பை இந்தியன்ஸ் தரப்பில் அபார பந்துவீச்சை வெளிப்படுத்திய ஜஸ்பிரித் பும்ரா 4 விக்கெட்டுகளைக் கைப்பற்றி அசத்தினார். டிரெண்ட் போல்ட் 3 விக்கெட்டுகளையும், வில் ஜாக்ஸ் 2 விக்கெட்டுகளையும், கார்பின் போஸ்ச் ஒரு விக்கெட்டினையும் கைப்பற்றினர்.

நடப்பு ஐபிஎல் தொடரில் மும்பை இந்தியன்ஸ் அணி 6-வது வெற்றியைப் பதிவு செய்துள்ளது. 10 போட்டிகளில் விளையாடியுள்ள மும்பை இந்தியன்ஸ் அணி, 12 புள்ளிகளுடன் புள்ளிப்பட்டியலில் இரண்டாவது இடத்துக்கு முன்னேறியுள்ளது.