உதகையில் மரங்கள் விழுந்ததால் போக்குவரத்து பாதிப்பு

உதகையை அடுத்த லவ்டேல் பகுதியில் மலை ரயில் பாதை மற்றும் சாலையில் அடுத்தடுத்து மூன்று மரங்கள் விழுந்ததால் ஞாயிற்றுக்கிழமை போக்குவரத்து பாதிக்கப்பட்டது.

நீலகிரி மாவட்டம், உதகை லவ்டேல் பகுதியில் ஞாயிற்றுக்கிழமை காலை முதலே காற்றின் தாக்கம் அதிகரித்து காணப்பட்டது.

இந்நிலையில், லவ்டேல் ரயில் பாதை, சாலையில் அடுத்தடுத்து மூன்று மரங்கள் விழுந்தன.இதனால், போக்குவரத்து பாதிக்கப்பட்டது.

தகவல் அறிந்து சம்பவ இடத்துக்கு வந்த தீயணைப்பு மற்றும் ரயில்வே பணியாளா்கள் மரங்களை அகற்றினா். மரம் உடனடியாக அப்புறப்படுத்தப்பட்டதால் மலை ரயில் சேவையில் பாதிப்பு ஏற்படவில்லை. சாலையில் விழுந்த மரங்கள் அகற்றப்பட்டதையடுத்து, வாகனப் போக்குவரத்தும் சீரானது.