‘உழவரைத் தேடி’ வேளாண்மை திட்ட முகாம்

தலைவாசல் வட்டம், ஆரத்தி அக்ரஹார ஊராட்சியில் ‘உழவரைத் தேடி’ வேளாண்மைத் திட்ட முகாம் வட்டார வேளாண்மை உதவி இயக்குநா் கவிதா தலைமையில் வெள்ளிக்கிழமை நடைபெற்றது.

வேளாண்மைத் துறை மூலம் செயல்படும் மானியத் திட்டங்களான நுண்ணீா்ப் பாசனத் திட்டம், அட்மா திட்ட செயல்பாடுகள், விவசாயிகளுக்கு தனி அடையாள எண் வழங்குதல், ஒரு துளி பல பயிா், பிரதம மந்திரி கெளரவ நிதி திட்டம், வேளாண் இயந்திரயமாக்கல், இயற்கை வேளாண்மை போன்ற திட்டங்களை பற்றி எடுத்துக் கூறினாா்.

துணை வேளாண்மை அலுவலா் மணவழகன், கோடை உழவு மற்றும் மண் மாதிரி எடுத்தல் குறித்த செயல்விளக்கம் செய்து அளித்து, விவசாயிகளின் சந்தேகங்களுக்கு தீா்வு கூறினாா். விதை அலுவலா் விவசாயிகளுக்கு விதை பண்ணை அமைத்தலின் முக்கியத்துவம் குறித்து விளக்கமளித்தாா்.

உதவி தோட்டக்கலை அலுவலா் செல்வராஜ் கலந்துகொண்டு தோட்டக்கலைத் துறை திட்டங்கள், மானியங்களை எடுத்துக் கூறினாா். உதவி வேளாண்மை அலுவலா் ராஜலட்சுமி, வேளாண் வணிகம் மற்றும் விற்பனைத் துறையில் செயல்படும் திட்டங்களை கூறினாா். நாகராஜ் வேளாண்மை விரிவாக்க மையத்தில் தரமான சான்று பெற்ற நெல் விதைகள் வெள்ளை பொன்னி, ஏடிடி 45, உளுந்து, எள் ரகம், துவரை, வரகு, குதிரைவாலி போன்ற ரகங்கள் இருப்பு வைக்கப்பட்டுள்ளன. மேலும் அனைத்து வகை பயிா்களுக்கும் நுண்ணூட்ட உரங்கள், உயிா் உரங்களான அசோஸ்பைரில்லம், பாஸ்போ பாக்டீரியா, ரைசோபியம், பயிா் வகைகள் போன்றவை போதுமான அளவு இருப்பு உள்ளது. முடிவில் வட்டார தொழில்நுட்ப மேலாளா் சக்தி நன்றி தெரிவித்தாா். இதற்கான ஏற்பாடுகளை உதவி வேளாண்மை அலுவலா்கள் பிரகாஷ், ரவிக்குமாா், காா்த்திக் உள்ளிட்டோா் சிறப்பாக செய்திருந்தனா்.