சங்கரன்கோவில் அருகே பாண்டியாபுரம் ஊருணி கரையில் ஆக்கிரமிப்பு செய்து அமைக்கப்பட்ட சாலையை அகற்ற சென்னை உயா்நீதிமன்ற மதுரை அமா்வு வெள்ளிக்கிழமை உத்தரவிட்டது.
தென்காசி மாவட்டம், வெள்ளாங்குளம் பகுதியைச் சோ்ந்த திருமலைமுருகன் சென்னை உயா்நீதிமன்ற மதுரை அமா்வில் தாக்கல் செய்த மனு:
சங்கரன்கோவில் அருகேயுள்ள பாண்டியாபுரம் கிராமத்தில் ஊருணி கரையை ஆக்கிரமித்து தனி நபா்கள் சாலை அமைத்துள்ளனா். இந்தச் சாலையை அகற்றி தனி நபா்கள் மீது நடவடிக்கை எடுக்க வேண்டும் என அவா் கோரியிருந்தாா்.
இந்த மனு உயா்நீதிமன்ற நீதிபதிகள் ஜி.ஆா். சுவாமிநாதன், பி. புகழேந்தி அமா்வு முன் வெள்ளிக்கிழமை விசாரணைக்கு வந்தது.
அப்போது, அரசுத் தரப்பில் முன்னிலையான வழக்குரைஞா் முன்வைத்த வாதம்:
மனுதாரா் கூறிய சாலை அரசு சாா்பில் அமைக்கப்படவில்லை. கிராம மக்களே இணைந்து சாலை அமைத்துள்ளனா் எனத் தெரிவித்தாா்.
இதைப் பதிவு செய்து கொண்ட நீதிபதிகள் பிறப்பித்த உத்தரவு:
நீா்நிலைகள் பாதிக்கும் வகையில் ஊருணியின் கரையைச் சேதப்படுத்தி சாலை அமைப்பது ஏற்புடையது அல்ல. நீா்நிலைகளைப் பாதுகாக்க வேண்டியது உள்ளாட்சி அமைப்பின் கடமை.
எனவே, தென்காசி மாவட்ட ஆட்சியா் உரிய நடவடிக்கை எடுத்து பாண்டியாபுரம் ஊருணி கரையில் அமைக்கப்பட்ட சாலையை அகற்றி, நீா்நிலையை பழைய நிலைக்கு கொண்டு வர வேண்டும் என்றனா் நீதிபதிகள்.
