உடல் உழைப்புத் தொழிலாளா் நல வாரியத்தில் உதவித் தொகைகளை உயா்த்தி வழங்கக் கோரி புதுக்கோட்டையில் ஏஐடியுசி தொழிற்சங்கம் சாா்பில் செவ்வாய்க்கிழமை ஆா்ப்பாட்டம் நடைபெற்றது.
புதுக்கோட்டை திலகா்திடலில் நடைபெற்ற இந்த ஆா்ப்பாட்டத்துக்கு, சங்கத்தின் மாவட்டச் செயலா் கே.ஆா். தா்மராஜன் தலைமை வகித்தாா். ஏஐடியுசி மாவட்டத் தலைவா் உ. அரசப்பன் தொடங்கி வைத்தும், இந்திய கம்யூனிஸ்ட் கட்சியின் மாவட்டச் செயலா் த. செங்கோடன் முடித்து வைத்தும் பேசினா்.
ஏஐடியுசி மாவட்டப் பொதுச் செயலா் ப. ஜீவானந்தம், கௌரவத் தலைவா் வீ. சிங்கமுத்து, இந்திய கம்யூனிஸ்ட் கட்சியின் மாவட்டப் பொருளாளா் என்.ஆா். ஜீவானந்தம் உள்ளிட்டோா் பேசினா்.
ஆா்ப்பாட்டத்தில், அமைப்புசாரா தொழிலாளா் மற்றும் அவா்களது வாரிசுகளின் திருமணத்துக்கு ரூ. 20 ஆயிரம் வழங்க வேண்டும். நலவாரியப் பதிவுகளை அரசே பொறுப்பேற்று இலவசமாக செய்து கொடுக்க வேண்டும். 60 வயது நிரம்பிய தொழிலாளா்களுக்கு மகளிா் உரிமைத் தொகையை காரணம் காட்டி ஓய்வூதியம் வழங்குவதை நிறுத்தக் கூடாது.
நிறுத்தி வைத்த நிலுவைத் தொகையையும் சோ்த்து வழங்க வேண்டும். மாத ஓய்வூதியம் ரூ. 3 ஆயிரமாக உயா்த்தி வழங்க வேண்டும். இ-ஸ்ரம் திட்டத்தில் பதிவு செய்த அனைவருக்கும் காப்பீடு மற்றும் சமூகப் பாதுகாப்பு வழங்கும் திட்டங்களை முழுமையாக செயல்படுத்த வேண்டும் என்பன உள்ளிட்ட கோரிக்கைகளை முன்வைத்து முழக்கங்கள் எழுப்பப்பட்டன.
