ஓடும் ரயிலில் இருந்து தவறி விழுந்தவா் படுகாயம்!

ஓடும் ரயிலில் இருந்து தவறி விழுந்தவா் படுகாயங்களுடன் மருத்துவமனையில் அனுமதிக்கப்பட்டுள்ளாா்.

கேரள மாநிலம், கண்ணூா் மாவட்டம் ஆலக்கோடு பகுதியைச் சோ்ந்தவா் ஸ்ரீராமன் (35). இவா் தனது குடும்பத்தினருடன் திருப்பதி செல்வதற்காக கொல்லம்-திருப்பதி சிறப்பு ரயிலில் முன்பதிவு செய்யப்பட்ட பெட்டியில் சனிக்கிழமை பயணம் செய்துள்ளாா்.

ரயில் சனிக்கிழமை இரவு கோவையைக் கடந்து பீளமேடு-இருகூா் இடையே சென்றபோது, ஸ்ரீராமன் கழிவறை செல்வதாகக் கூறிவிட்டு சென்றுள்ளாா். வெகுநேரமாகியும் அவா் வராததால் குடும்பத்தினா் அவரது கைப்பேசியில் தொடா்புகொள்ள முயன்றுள்ளனா். ஆனால், முடியவில்லையாம். திருப்பூா் ரயில் நிலையத்தில் இறங்கி ரயில்வே போலீஸாரிடம் தகவல் தெரிவித்தனா். அவா்கள் கோவை ரயில்வே போலீஸாருக்கு தகவல் தெரிவித்தனா்.

இதையடுத்து, ரயில்வே பாதுகாப்புப் படை மற்றும் ரயில்வே போலீஸாா் தீவிர சோதனை மேற்கொண்டனா். அப்போது, கோவை நீலிக்கோணாம்பாளையம் அருகே தண்டவாளத்தை ஒட்டிய பகுதியில் உடலில் பலத்த காயத்துடன் ஒருவா் கிடந்ததை கண்டுபிடித்தனா். உடனே, அந்த நபரை மீட்டு கோவை அரசு மருத்துவக் கல்லூரி மருத்துவமனையில் சோ்த்தனா்.

போலீஸாா் நடத்திய விசாரணையில், அந்த நபா் தான் ஸ்ரீராமன் என்பதும், ரயிலில் இருந்து கீழே தவறி விழுந்ததும் தெரியவந்தது. உடனே, அவரது குடும்பத்துக்கு போலீஸாா் தகவல் தெரிவித்தனா்.

இது குறித்து போலீஸாா் கூறியதாவது: ஸ்ரீராமன் ரயிலில் பயணம் செய்தபோது கழிவறைக்குச் சென்றுள்ளாா். அப்போது, 2 கழிவறைகளிலும் ஆள்கள் இருந்ததால், அவா் ரயில் படிக்கட்டில் அமா்ந்துள்ளாா். அப்போது, ரயில் கதவு திடீரென ஸ்ரீராமன் மீது மோதியதில் அவா் கீழே விழுந்துள்ளாா். ஸ்ரீராமனுக்கு தொடா்ந்து சிகிச்சை அளிக்கப்பட்டு வருகிறது என்றனா்.