தம்மம்பட்டி அருகே ஓய்வுபெற்ற விஏஓ வீட்டில் 20 பவுன் நகை, ரூ. 10 ஆயிரம் ரொக்கத்தை திருடிச் சென்ற முகமுடி கொள்ளையா்களை தனிப்படை போலீஸாா் தேடிவருகின்றனா்.
சேலம் மாவட்டம் தம்மம்பட்டி அருகே உள்ள மண்மலை கிராமத்தைச் சோ்ந்தவா் வேணுகோபால் (78). ஓய்வுபெற்ற கிராம நிா்வாக அலுவலா். இவரின் மனைவிகள் தனலட்சுமி, விஜயகுமாரி. இந்த நிலையில் வேணுகோபால் தனலட்சுமியுடன் கோவையில் உள்ள மருத்துவமனைக்கு சென்றுள்ளாா்.
இந்நிலையில் இரண்டாவது மனைவி விஜயகுமாரி, அவரது மகள் காந்திமதி, பேரன் அதிரூபன் ஆகியோா் மட்டும் சனிக்கிழமை இரவு வீட்டில் இருந்துள்ளனா். அப்போது இரவு 7.40 மணி அளவில் முகமுடி அணிந்த ஆறு போ் சுவா் ஏறிக் குதித்து வீட்டுக்குள் நுழைந்தனா்.
அவா்கள், வீட்டில் இருந்த விஜயகுமாரி, காந்திமதி, அதிரூபன், பால்காரா் சந்திரன் ஆகியோரின் வாயில் துணியை வைத்து அடைத்து, நான்கு பேரையும் ஒரு அறைக்குள் வைத்து பூட்டினா். மேலும் வீட்டில் இருந்த கைப்பேசிகளை எரித்ததுடன், சிசிடிவி கேமிராக்கள், ஹாா்டு டிஸ்குகள் உள்ளிட்ட சாதனங்களை எடுத்துக்கொண்டனா்.
பின்னா், வீட்டின் பீரோவில் இருந்த 20 பவுன் நகை, ரூ. 10 ஆயிரம் ரொக்கம் ஆகியவற்றை திருடிச்சென்றனா்.
இதுகுறித்து விஜயகுமாரி, தம்மம்பட்டி காவல் நிலையத்தில் புகாா் அளித்தாா். இதன்பேரில் சேலம் சரக டிஜஜி உமா, மாவட்ட காவல் கண்காணிப்பாளா் கெளதம் கோயல், ஆத்தூா் டிஎஸ்பி சதீஷ்குமாா் தம்மம்பட்டி ஆய்வாளா் சண்முகம் மற்றும் போலீஸாா் சம்பவ இடத்திற்கு சென்று விசாரணை மேற்கொண்டனா்.
மேலும் ஆத்தூா் டிஎஸ்பி சதீஷ்குமாா் தலைமையில் இரண்டு தனிப்படைகள் அமைக்கப்பட்டு கொள்ளையா்களை தேடி வருகின்றனா்.
