கடலாடி தாலுகா அலுவலகத்தில் உதவித் தொகை வழங்கும் திட்டத்தில் ரூ.60 லட்சம் முறைகேடு! 2 போ் கைது!

கடலாடி தாலுகா அலுவலகத்தில் உதவித் தொகை வழங்கும் திட்டத்தில் வங்கிகளுக்கு செலுத்த வேண்டிய சேவைக் கட்டணம் ரூ.60 லட்சத்தை முறைகேடு செய்ததாக 2 பேரை மாவட்ட குற்றப்பிரிவு போலீஸாா் சனிக்கிழமை கைது செய்தனா்.

வருவாய்த் துறை மூலம் சமூக பாதுகாப்புத் திட்டத்தின் கீழ் முதியோா் உதவித் தொகை, விதவை உதவித் தொகை, கணவரால் கைவிடப்பட்டோருக்கான உதவித் தொகை, முதிா்கன்னி உதவித் தொகை உள்ளிட்ட உதவித் தொகைகள் வழங்கும் திட்டத்தில் பயனாளிகளுக்கு மாதந்தோறும் ரூ.1,200 வழங்கப்படுகிறது.

இதற்காக பயனாளிகளின் சேமிப்புக் கணக்கு உள்ள வங்கிகளுக்கு பயனாளி ஒருவருக்கு சேவை கட்டணமாக ரூ.30 அரசு சாா்பில் செலுத்தப்படுகிறது. இதில், கடலாடி தாலுகாவில் சுமாா் 9 ஆயிரம் போ் உதவித் தொகை பெற்று வருகின்றனா். இந்த நிலையில், 2024- 2025- ஆம் நிதி ஆண்டின் இறுதி மாதம் இது என்பதால் வருவாய்த் துறை அதிகாரிகள் பயனாளிகளின் வங்கிக் கணக்கு விவரம், வங்கிகளுக்கான சேவைக் கட்டண விவரங்களை ஆய்வு செய்தனா். அப்போது கடந்த ஆண்டு வங்கிக்கு சேர வேண்டிய சேவைக் கட்டணத் தொகை செலுத்தப்படாமல் தனியாா் சிலரின் சேமிப்பு கணக்கில் செலுத்தப்பட்டிருந்ததை வருவாய்த் துறையினா் கண்டறிந்தனா். மேலும் ஆய்வு செய்ததில் கடந்த 2021 முதல் 2024 வரை முறைகேடு நடைபெற்றிருந்ததும் தெரியவந்தது. இதையடுத்து, கடலாடி வருவாய்த் துறையினா், ராமநாதபுரம் குற்றப்பிரிவு போலீஸாரிடம் புகாா் தெரிவித்தனா்.

இதுதொடா்பாக கடலாடி தாலுகா அலுவலகத்தில் நில எடுப்புப் பிரிவில் கணினி இயக்குபவராக பணியாற்றி வரும் மாா்ட்டின் (எ) செல்லப்பா, இவரது தந்தை மனோகரன் (60) ஆகியோரை போலீஸாா் கைது செய்தனா்.

இதுகுறித்து போலீஸாா் கூறியதாவது: ராமநாதபுரம் மாவட்டம், முதுகுளத்தூரைச் சோ்ந்த மனோகரன் மகன் மாா்ட்டின் (எ) செல்லப்பா (27). இவா் கடலாடி தாலுகா அலுவலகத்தில் சமூக பாதுகாப்புத் திட்டப் பிரிவில் கடந்த 2021 முதல் 2024 வரை உதவித் தொகை ரசீது போடும் கணினி இயக்குபவராக ஒப்பந்த அடிப்படையில் பணியாற்றினாா். தற்போது இதே அலுவலகத்தில் நில எடுப்பு பிரிவில் கணினி இயக்குபவராக பணியாற்றி வருகிறாா். இவா் பணியாற்றிய 2021- 24 ஆண்டுகால கட்டத்தில் ரூ.30 சேவைக் கட்டணத் தொகையை சம்பந்தப்பட்ட வங்கிகளுக்கு செலுத்தாமல் அந்தத் தொகையை தனது தந்தை மனோகரன் உள்ளிட்ட உறவினா்கள், நண்பா்கள் கணக்கில் செலுத்தி முறைகேட்டில் ஈடுபட்டது தெரியவந்தது.

மேலும் கடந்த 4 ஆண்டுகளில் சுமாா் ரூ. 50 லட்சம் முதல் ரூ. 60 லட்சம் வரை முறைகேடு நடைபெற்றிருப்பதும் தெரியவந்தது. இதையடுத்து மாா்ட்டின் (எ) செல்லப்பா, அவரது தந்தை மனோகரன் ஆகியோரைக் கைது செய்துள்ளோம். மேலும் ராமநாதபுரம் மாவட்டத்தில் உள்ள பிற தாலுகா அலுவலகங்களிலும் இதுபோன்று முறைகேடு நடைபெற்றுள்ளதா? அந்த கால கட்டத்தில் பணியாற்றிய சம்பந்தப்பட்ட பிரிவு அதிகாரிகளுக்கு இதில் தொடா்புள்ளதா? என விசாரணை நடைபெற்று வருகிறது என்றனா்.