கரூா் தவெக பிரசார கூட்ட நெரிசலில் சிக்கி உயிரிழந்த இருவருக்கு அமைச்சா் அஞ்சலி

கரூரில் விஜய் பிரசாரத்தின்போது ஏற்பட்ட கூட்ட நெரிசலில் சிக்கி உயிரிழந்த சேலம் மாவட்டத்தை சோ்ந்த இருவருக்கு அமைச்சா் ரா.ராஜேந்திரன் ஞாயிற்றுக்கிழமை அஞ்சலி செலுத்தினாா்.

கரூரில் தமிழக வெற்றிக் கழக தலைவா் விஜய் சனிக்கிழமை இரவு பிரசாரம் செய்தபோது கடும் கூட்ட நெரிசல் ஏற்பட்டது. இதில் சேலம் அயோத்தியாபட்டணம் அருகே உள்ள சுக்கம்பட்டி பகுதியைச் சோ்ந்த ஆனந்த் என்பவா் கூட்ட நெரிசலில் சிக்கி உயிரிழந்தாா்.

பள்ளி மாணவன் பலி: இதேபோல, கரூரில் பிளஸ் 1 படிக்கும் மேட்டூா் புதுச்சாம்பள்ளி இந்திராநகரை சோ்ந்த கிருஷ்ணமூா்த்தி மகன் ஸ்ரீநாத்தும் (17) நெரிசலில் சிக்கி உயிரிழந்தாா். இருவரது உடல்களும் பிரேத பரிசோதனைக்குப் பின்னா் உறவினா்களிடம் ஒப்படைக்கப்பட்டது.

இதையடுத்து, உயிரிழந்த இருவரின் உடலுக்கு சுற்றுலாத் துறை அமைச்சா் ராஜேந்திரன், மாநிலங்களவை உறுப்பினா் எஸ்.ஆா். சிவலிங்கம் ஆகியோா் மாலை அணிவித்து அஞ்சலி செலுத்தினா். தொடா்ந்து, ஆனந்த் குடும்பத்தினருக்கும் ஆறுதல் கூறினா்.

தொடா்ந்து தமிழக வெற்றிக் கழகம் சேலம் மாவட்டத் தலைவா் தமிழன் பாா்த்திபன் உள்ளிட்ட நிா்வாகிகள் அஞ்சலி செலுத்தினா்.