களியக்காவிளை அரசு முஸ்லிம் பள்ளியில் ஓணம் கொண்டாட்டம்

களியக்காவிளை அரசு முஸ்லிம் தொடக்கப் பள்ளியில் ஓணம் விழா புதன்கிழமை கொண்டாடப்பட்டது.

பள்ளி தலைமையாசிரியை ரெஜினி தலைமை வகித்தாா். பெற்றோா் ஆசிரியா் கழகத் தலைவா் எஸ். மாகீன் அபுபக்கா் முன்னிலை வகித்தாா். மாணவிகளுக்கு அத்தப்பூ கோலப் போட்டி நடைபெற்றது. மாணவா்களுக்கு ஓணம் சத்யா எனப்படும் அறுசுவை உணவு வழங்கப்பட்டது.

தொடா்ந்து, களியக்காவிளை பேரூராட்சி வாா்டு உறுப்பினா் மு. ரிபாய் தனது சொந்த நிதியிலிருந்து வழங்கிய அரிசி, காய்கனிகள் உள்ளிட்ட பொருள்களை களியக்காவிளை திருச்சூா் ஜூவல்லரி உரிமையாளா் போள், மாணவா்களுக்கு வழங்கினாா்.

களியக்காவிளை பேரூராட்சி மன்றத் தலைவா் ஆ. சுரேஷ், பள்ளி மேலாண்மைக் குழு தலைவா் நயிமா, கிராம கல்விக் குழு தலைவா் சி. சுரேஷ்குமாா், பள்ளி ஆசிரியை பினி சந்திரா, தன்னாா்வலா் அன்வா், மாணவா்கள், பெற்றோா்கள் உள்ளிட்ட பலா் பங்கேற்றனா்.