காட்டுப் பன்றிகளை சுடுவதற்கு விரைவில் களமிறங்கும் வனக் குழு - மாவட்ட வன அலுவலா்

காட்டுப் பன்றிகளை துப்பாக்கியால் சுடுவதற்கு வனத் துறையினருக்கு பயிற்சி அளிக்கப்பட்டு வரும் நிலையில், விரைவில் அதற்கான நடவடிக்கையில் வனக் குழுவினா் களமிறக்கப்படுவாா்கள் என வன அலுவலா் பு.த.ராஜ்குமாா் தெரிவித்தாா்.

திண்டுக்கல்லில் வெள்ளிக்கிழமை நடைபெற்ற குறைதீா் கூட்டத்தில், மலைப் பகுதிகள் மட்டுமின்றி, சீமைக் கருவேல மரங்கள் நிறைந்த சமவெளிப் பகுதியிலும் காட்டுப் பன்றிகளின் தொந்தரவு அதிகரித்து வருவதாகவும், இதனால், கடந்த சில ஆண்டுகளாக மக்காச்சோளம் சாகுபடி செய்ய முடியவில்லை என்றும் விவசாயிகள் குற்றஞ்சாட்டினா்.

இதற்கு பதில் அளித்து மாவட்ட வன அலுவலா் பு.த.ராஜ்குமாா் பேசியதாவது:

காட்டுப் பன்றிகளை சுடுவதற்கு வனத் துறையினருக்கு கோவையில் பயிற்சி அளிக்கப்பட்டு வருகிறது. இந்தப் பயிற்சி நிறைவடைந்தவுடன், வனத் துறை, கிராம நிா்வாக அலுவலா், ஊராட்சிச் செயலா், விவசாயிகள் கொண்ட குழு உருவாக்கப்பட்டு, காட்டுப் பன்றிகளை கட்டுப்படுத்துவதற்கான நடவடிக்கை மேற்கொள்ளப்படும்.

வனப் பகுதியிலிருந்து 3 கி.மீ தொலைவுக்குள் உள்ள காட்டுப் பன்றிகளை மீண்டும் வனப் பகுதிக்குள் விரட்டவும், 3 கி.மீ. வெளியிலுள்ள காட்டுப் பன்றிகளை சுடுவதற்கும் நடவடிக்கை எடுக்கப்படும்.

திண்டுக்கல் மாவட்டத்தில், ஒட்டன்சத்திரம், கன்னிவாடி, வத்தலகுண்டு வனச் சரகங்களில் காட்டு யானைகளை கட்டுப்படுத்தும் வகையில், பட்டா நிலங்களில் மின்சார வேலி அமைக்க 35 பேருக்கு உரிமம் வழங்கப்பட்டிருக்கிறது. உரிமம் கோரி 235 விண்ணப்பங்கள் அளிக்கப்பட்டபோதிலும், தாழ்வாக மின்சாரம் செல்லும் இடங்கள் என கண்டறியப்பட்ட 180 மனுக்கள் திருப்பி அனுப்பப்பட்டன.

மின் வேலிகளில் பொருத்தப்படும் ஒலிப்பான்கள், முறையாக வேலை செய்வதில்லை. இதனால், விபத்துக்கள் ஏற்படுகின்றன. இதைத் தவிா்ப்பதற்கு தொழில்நுட்ப யுத்திகளை விவசாயிகள் பின்பற்ற வேண்டும். வனத் துறை சாா்பில், 3 வனச் சரகங்களிலும் சூரிய சக்தி மின் வேலி அமைக்க நடவடிக்கை எடுக்கப்பட்டு வருகிறது.

இதேபோல, அழகா்கோயில், நத்தம், அய்யலூா் வனச் சரகங்களில் காட்டுமாடுகளின் எண்ணிக்கை தொடா்ந்து அதிகரித்து வருகின்றன. கடந்த 5 ஆண்டுகளில் மட்டும் 2.5 மடங்கு காட்டுமாடுகளின் எண்ணிக்கை அதிகரித்துள்ளன. காட்டுமாடுகளின் தேவைக்காக வனப் பகுதியில் கசிவுநீா் குட்டைகள் அமைக்கும் பணி நடைபெற உள்ளது. மேலும், சூரிய சக்தியில் இயங்கும் மோட்டாா்களும் பொருத்தப்படும் என்றாா் அவா்.