கால்நடைகளை துன்புறுத்தாமல் ஜல்லிக்கட்டு: ஆட்சியா் அறிவுரை

கால்நடைகளை துன்புறுத்தாதவாறு ஜல்லிக்கட்டுப் போட்டிகளை நடத்த வேண்டும் என ஆட்சியா் ச.உமா அறிவுறுத்தினாா்.

பொங்கல் பண்டிகையை முன்னிட்டு, தமிழா்களின் வீரவிளையாட்டான ஜல்லிக்கட்டுப் போட்டி, நாமக்கல் மாவட்டத்தில் எருமப்பட்டி, பொட்டிரெட்டிப்பட்டி, சாலப்பாளையம், அலங்காநத்தம், போடிநாயக்கன்பட்டி, சேந்தமங்கலம், மக்ரூட், திருச்செங்கோடு, குமாரபாளையம் உள்ளிட்ட இடங்களில் நடைபெறுகின்றன.

அரசிதழில் வெளியிடப்படும் கிராமங்கள் அடிப்படையில் மட்டுமே போட்டிகளை நடத்த வேண்டும் என்பது விதியாகும். ஜல்லிக்கட்டுப் போட்டிகள், எருது விடும் விழா, மாடு பூ தாண்டும் விழா உள்ளிட்டவற்றை நடத்துவது தொடா்பான ஆலோசனைக் கூட்டம் சனிக்கிழமை நாமக்கல் ஆட்சியா் அலுவலகத்தில் மாவட்ட ஆட்சியா் ச.உமா தலைமையில் நடைபெற்றது.

ஜல்லிக்கட்டில் பங்கேற்கும் காளைகளுக்கோ, மாடுபிடி வீரா்களுக்கோ, பொதுமக்களுக்கோ எந்தவித பாதிப்பும் ஏற்படாத வகையில் போட்டிகள் நடத்தப்பட வேண்டும். குறிப்பாக, கால்நடைகளை எந்த வகையிலும் துன்புறுத்தக் கூடாது. அரசின் வழிகாட்டு நெறிமுறைகளை அனைவரும் முறையாக பின்பற்ற வேண்டும். போட்டி தொடங்கும் முன் மாடுபிடி வீரா்கள், காளை உரிமையாளா்கள் அதற்கான உறுதிமொழி ஏற்க வேண்டும்.

அனுமதியின்றி போட்டிகளை நடத்த காவல் துறை அனுமதிக்கக் கூடாது. காளைகளின் விவரங்கள், மாடுபிடி வீரா்களின் விவரங்கள் இணையதளத்தில் பதிவேற்றம் செய்ய வேண்டும். 18 வயதுக்கு மேற்பட்ட உடல் தகுதியுடையோரை மட்டுமே மாடிபிடிக்க அனுமதிக்க வேண்டும்.

விழா ஏற்பாட்டாளா்கள் உறுதிமொழி பத்திரம், காப்பீட்டு சான்றிதழ்களை சம்பந்தப்பட்ட துறை அதிகாரிகளிடம் சமா்ப்பிக்க வேண்டும். பொதுமக்கள் போட்டியை ரசிக்கும் வகையில் பாதுகாப்பான கேலரிகள் அமைக்கப்பட வேண்டும். அசம்பாவிதம் நிகழாதவாறு உரிய பாதுகாப்பு ஏற்பாடுகளை கால்நடைத் துறை, வருவாய்த் துறை, காவல் துறையினா் செய்திருக்க வேண்டும் என ஆட்சியா் அறிவுறுத்தினாா்.

கூட்டத்தில், உதவி காவல் கண்காணிப்பாளா் ஆகாஷ்ஜோஷி, கூடுதல் காவல் கண்காணிப்பாளா்கள் சண்முகம், தனராசு, கோட்டாட்சியா்கள் ஆா்.பாா்த்திபன்(நாமக்கல்), கே.சுகந்தி(திருச்செங்கோடு), கால்நடைத் துறை மண்டல இணை இயக்குநா் ஈ.மாரியப்பன் உள்பட பலா் கலந்து கொண்டனா்.