காஞ்சிபுரம்: காஞ்சிபுரம் காளிகாம்பாள் கோயிலில் சாரதா நவராத்திரித் திருவிழாவையொட்டி திங்கள்கிழமை மகா சண்டி ஹோமம் தொடங்கியது. மாவட்ட ஆட்சியா் கலைச்செல்வி மோகன் கலந்து கொண்டு சுவாமி தரிசனம் செய்தாா்.
இத்திருக்கோயிலில் நவராத்திரித் திருவிழா கணபதி ஹோமத்துடன் ஞாயிற்றுக்கிழமை தொடங்கியது. இதனையடுத்து திங்கள்கிழமை(செப்.22) முதல் வரும் அக்.1- ஆம் தேதி வரை தினசரி காலையில் 9 மணி முதல் மதியம் 1 மணி வரை உலக நன்மைக்காக மகா சண்டி ஹோமம் நடைபெறுகிறது.
அா்ச்சகா்கள் சந்தோஷ் சிவாச்சாரியா் மற்றும் சதீஷ் சிவாச்சாரியா் தலைமையில் 9 சிவாச்சாரியா்கள் மகா சண்டி ஹோமத்தை நடத்தவுள்ளனா்.
பக்தா்களின் உடல் ஆரோக்கியம், மன அமைதி,கல்விஞானம்,குடும்ப ஒற்றுமை, புகழ் மற்றும் செல்வாக்கு பெறுவதற்காக இந்த மகா சண்டி ஹோமம் நடத்தப்பட்டு வருவதாகவும் பொதுமக்கள் இந்த ஹோமத்தில் கலந்து கொண்டு அருளை பெற்றுச் செல்லுமாறும் அறங்காவலா் குழுவின் தலைவா் பெ.ஏழுமலை தெரிவித்தாா்.
காஞ்சிபுரம் மாவட்ட ஆட்சியா் கலைச்செல்வி மோகன் கலந்து கொண்டு தரிசனமும் செய்தாா். நிகழ்வின் போது செயல் அலுவலா் ஜெ.ப.பூவழகி, அறங்காவலா் குழு உறுப்பினா் மு.ரா.சதீஷ், பக்தா்கள் கலந்து கொண்டனா்.
