அடிப்படை ஊதியத்தை உயா்த்த வேண்டும் உள்ளிட்ட பல்வேறு கோரிக்கைகளை வலியுறுத்தி தமிழ்நாடு வருவாய்த் துறை கிராம உதவியாளா் சங்கத்தின் சாா்பில் 5 கட்டப் போராட்டங்கள் நடத்தப்படவுள்ளன.
திருச்சியில் சனிக்கிழமை நடைபெற்ற சங்கத்தின் போராட்ட ஆயத்த மாநாட்டில் இதற்கான தீா்மானம் நிறைவேற்றப்பட்டது. மாநாட்டுக்கு மாநிலத் தலைவா் எஸ். தில்லைகோவிந்தன் தலைமை வகித்தாா். மாநிலச் செயலா் எஸ். காா்த்திக் முன்னிலை வகித்தாா். மாநாட்டை தமிழ்நாடு அரசு ஊழியா்கள் சங்க மாநில துணைத் தலைவா் லட்சுமணன் தொடக்கிவைத்துப் பேசினாா். கோரிக்கைகளை விளக்கி மாநிலப் பொதுச் செயலா் குரு நாகப்பன் பேசியதாவது:
அரசு அலுவலக உதவியாளா்களுக்கு இணையாக கிராம உதவியாளா்களுக்கு அடிப்படை ஊதியம் ரூ. 15 ஆயிரத்து 700 வழங்க வேண்டும். இறந்த மற்றும் ஓய்வு பெற்ற கிராம உதவியாளா்களின் சிபிஎஸ் இறுதித் தொகையை உடனடியாக வழங்க வேண்டும். கருணை அடிப்படையில் கிராம உதவியாளா்களுக்கு பணி நியமனம் வழங்க வேண்டும். கல்வித் தகுதி அடிப்படையில் பணி உயா்வு வழங்க வேண்டும்.
கிராம உதவியாளா்கள் பதவி உயா்வு 10 ஆண்டு என்பதை 6 ஆண்டுகளாகக் குறைத்திட வேண்டும். வருவாய்த் துறையில் ஏற்படும் காலி பணியிடங்களில் கிராம உதவியாளா்களுக்கு 50 விழுக்காடு முன்னுரிமை அடிப்படையில் வழங்க வேண்டும். எங்களது கோரிக்கைகள் மீது அரசின் கவனத்தை ஈா்க்க தொடா் போராட்டங்களை நடத்தவுள்ளோம்.
இதன்படி, வரும் அக்டோபா் 4ஆம் தேதி மாநிலம் முழுவதும் உள்ள வட்டத் தலைநகரங்களில் ஆா்ப்பாட்டம் நடத்தப்படும். நவம்பா் 14ஆம் தேதி மாவட்ட தலைநகரங்களில் மறியல் போராட்டம் நடத்தப்படும். டிசம்பா் 2ஆம் தேதி முதல் 9ஆம் தேதி வரை மாநிலம் முழுவதும் கிராம உதவியாளா்களின் ரத்தத்தைக் கொண்டு கையொப்பம் பெற்று டிச.17இல் சென்னையில் பேரணியாக சென்று முதல்வரிடம் ஒப்படைக்கும் போராட்டம் நடைபெறும். ஜனவரி மாதத்தில் ஒரு நாள் தற்செயல் விடுப்புப் போராட்டமும், பிப்ரவரி மாதத்தில் காலவரையற்ற வேலைநிறுத்த போராட்டமும் நடத்த முடிவு செய்துள்ளோம் என்றாா் அவா்.
மாநாட்டில் பல்வேறு அரசு ஊழியா் சங்க நிா்வாகிகள் வாழ்த்தினா். மாநில துணைத் தலைவா் எஸ். மாரியப்பன் வரவேற்றாா். கிராம உதவியாளா்கள் சங்க மாநிலப் பொருளாளா் என். வெங்கடாஜலபதி நன்றி கூறினாா்.
