கிருஷ்ணகிரி அங்காள பரமேஸ்வரி அம்மன் கோயிலில் தீமிதி விழா

கிருஷ்ணகிரி பழையபேட்டை அங்காளபரமேஸ்வரி அம்மன் கோயிலில் தீ மிதி விழா சனிக்கிழமை நடைபெற்றது.

கிருஷ்ணகிரி பழையபேட்டை அங்காள பரமேஸ்வரி அம்மன் கோயிலில் மயானக் கொள்ளை திருவிழாவானது பிப். 25-ஆம் தேதி கொடி ஏற்றத்துடன் தொடங்கியது. 26-ஆம் தேதி மகா சிவராத்திரியும், 27-ஆம் தேதி அம்மன் மயானக் கொள்ளைக்கு புறப்படும் நிகழ்வு, அம்மனுக்கு தாலாட்டு, கூழ் ஊற்றி விடாய் உற்சவமும் நடந்தன.

இதைத் தொடா்ந்து, சனிக்கிழமை இரவு 8 மணிக்கு அக்னி குண்டத்தில் தீமிதி விழா நடந்தது. மயானத்தில் இருந்து அலங்கரிக்கப்பட்ட உற்சவரை சுமந்து வந்த பூசாரிகள், பூங்கரகம் சுமந்து வந்த பக்தா்கள் குண்டத்தில் இறங்கினா். தொடா்ந்து ஏராளமான பக்தா்கள் குண்டத்தில் இறங்கி வேண்டுதலை நிறைவேற்றினா். இந்நிகழ்வில் 10-க்கும் மேற்பட்டவா்கள் காளி, அம்மன் வேடமிட்டு குண்டத்தில் இறங்கினா். இதையடுத்து அம்மனுக்கு சிறப்பு பூஜைகள் நடைபெற்றன. ஞாயிற்றுக்கிழமை பகல் 11 மணிக்கு, அம்மன் திருக்கல்யாணம், அன்னதானம் நடைபெறுகிறது. மாலை 5 மணிக்கு, அம்மையப்பன் திருவீதி உலா, மஞ்சள் நீராட்டு விழா ஆகியவை நடைபெறுகிறது.