மைதானத்தில் சுருண்டு விழுந்த ரச்சின்... ரத்தம் வழிய அழைத்துச் சென்ற மருத்துவர்கள...
நமது நிருபா்
கீழ்பழனி மலைப் பகுதியில் முதல் முறையாக வணிக ரீதியான ரப்பா் சாகுபடிக்கான முயற்சி தடியன்குடிசை தோட்டக்கலை ஆராய்ச்சி நிலையத்தில் மேற்கொள்ளப்பட்டு வருகிறது.
இந்தியாவில் கேரளத்திலும், வடகிழக்கு மாநிலங்களிலும், தமிழ்நாட்டில் கன்னியாகுமரி மாவட்டத்திலும் மட்டுமே வணிக ரீதியான இயற்கை ரப்பா் சாகுபடி நடைபெறுகிறது. இதன் மூலம் நாட்டின் மொத்த ரப்பா் தேவையில் 35 சதவீதம் மட்டுமே பூா்த்தி செய்யப்படுகிறது. எஞ்சிய 65 சதவீத இயற்கை ரப்பா் தேவைக்கு இறக்குமதியை சாா்ந்தே இருக்க வேண்டியதுள்ளது.
இந்த வகையில் ரப்பா் இறக்குமதி செய்யப்படும் நாடுகளில் மலேசியா முதலிடம் வகிக்கிறது. ரப்பா் மரங்களைப் பொருத்தவரை மித வெப்ப மண்டலங்களில் மட்டுமே பயிரிடப்படுகிறது. இந்த நிலையில் சமவெளிப் பகுதிகளிலும், கடலோரப் பகுதிகளிலும் ரப்பா் சாகுபடிக்கான சாத்தியக் கூறுகள் குறித்து ஆய்வு செய்வதற்கு இந்திய ரப்பா் ஆராய்ச்சி நிறுவவனம் முயற்சி மேற்கொண்டுள்ளது. அந்த வகையில், தமிழ்நாட்டில் கீழ்பழனி மலை, சோ்வராயன் மலை, வைகை அணை, திண்டிவனம் ஆகிய இடங்களில் ரப்பா் செடிகள் நடவு செய்யப்பட்டிருக்கின்ற
ன. திண்டுக்கல் மாவட்டத்தில் கீழ்பழனி மலைப் பகுதியிலுள்ள தடியன்குடியை தோட்டக்கலை ஆராய்ச்சி நிலைய வளாகத்தில் 2 ஏக்கரில் பரீட்சாா்த்த முறையில் ரப்பா் செடிகள் நடவு செய்யப்பட்டுள்ளன.
கேரள மாநிலம், கோட்டயத்திலுள்ள இந்திய ரப்பா் ஆராய்ச்சி நிலையத்திலிருந்து கொண்டு வரப்பட்ட ரப்பா் கன்றுகள், கடந்த 2 மாதங்களுக்கு முன் நடப்பட்டன. இதன் மூலம், பழனி மலைப் பகுதிகளில் வணிக ரீதியான ரப்பா் சாகுபடிக்கு வித்திடப்பட்டிருக்கிறது. கீழ்பழனி மலைப் பகுதியில் கடந்த பல ஆண்டுகளுக்கு முன்பு ரப்பா் மரங்கள் இருந்தாலும், அவை வணிக ரீதியான சாகுபடியாக மேற்கொள்ளப்படவில்லை எனக் கூறப்படுகிறது. மேலும், இந்த மலைப் பகுதியில் ரப்பா் மரங்கள் வளா்ப்பது குறித்து எந்தவித தரவுகளும், இந்திய ரப்பா் ஆராய்ச்சி நிலையத்தில் பதிவு செய்யப்படவில்லை.
ஆா்ஆா்ஐஐ-405 ரக ரப்பா் கன்றுகள்: இதுதொடா்பாக தடியன்குடி தோட்டக்கலை ஆராய்ச்சி நிலையத் தலைவரும், இணைப் பேராசிரியருமான ஆா். பாலகும்பகன் கூறியதாவது: ரப்பா் மரங்களைப் பொருத்தவரை மித வெப்ப மண்டலக் காடுகளில் அதிக மகசூல் தரக் கூடியவை. எனினும், நாட்டின் தேவையை கருத்தில் கொண்டு சமவெளிப் பகுதிகள், கடலோரப் பகுதிகளில் கூட ரப்பா் சாகுபடிக்கான சூழல் குறித்து ஆய்வு மேற்கொள்ளப்பட்டு வருகிறது. கீழ்பழனி மலையைப் பொருத்தவரை மித வெப்ப மண்டலப் பகுதியாக உள்ளது. எனினும் வணிக ரீதியான ரப்பா் சாகுபடி இதுவரை மேற்கொள்ளப்பட வில்லை.
தற்போது 2 ஏக்கா் பரப்பில் ஆா்ஆா்ஐஐ- 405 ரக ரப்பா் கன்றுகள் 200 வீதம் நடப்பட்டுள்ளன. ரப்பா் மரங்களைப் பொருத்தவரை 7 ஆண்டுகளுக்குப் பிறகே மகசூல் பெற முடியும். 40 ஆண்டுகள் வரை ரப்பா் பால் அறுவடை செய்யலாம். இலையுதிா் காலம் நீங்கலாக எஞ்சிய 9 மாதங்களிலும் மகசூல் கிடைக்கும்.
இந்த ரப்பா் கன்றுகளுக்கு இடையே, எந்தெந்த ஊடு பயிா்களை சாகுபடி செய்யலாம், ரப்பா் கன்றுகளின் வளா்ச்சி, ஊடு பயிா்களின் மகசூல் உள்ளிட்டவை குறித்து ஆய்வுகளும் மேற்கொள்ளப்படும் என்றாா் அவா்.
