ராஜஸ்தான் மாநிலத்தில் இருந்து செங்கல்பட்டுக்கு காரில் குட்கா, புகையிலைப் பொருள்கள் கடத்தி வந்த நபரை போலீஸாா் கைது செய்தனா்.
ராஜஸ்தான் மாநிலத்தில் இருந்து செங்கல்பட்டுக்கு காரில் குட்கா புகையிலை பொருள்கள் கடத்தி வரப்படுவதாக காஞ்சிபுரம் சரக ஒழுங்கமைப்பட்ட குற்ற உளவு போலீஸாருக்கு வந்த ரகசிய தகவலின் பேரில், போலீஸாா் வியாழக்கிழமை செங்கல்பட்டு - காஞ்சிபுரம் சாலையில் பாலூா் பகுதியில் வாகனச் சோதனையில் ஈடுபட்டு இருந்தனா்.
அப்போது அந்த வழியாக வந்த ஹூண்டாய் கிரிஷ்டா காரை நிறுத்த முயன்றபோது காா் நிற்காமல் சென்றது. காரை போலீஸாா் துரத்திச் சென்றனா். பாலூா் காவல் நிலையம் அருகில் சென்றதும் காரில் இருந்த 3 நபா்கள் இறங்கி தப்பி ஓடினா். இருவா் தப்பிச்சென்ற நிலையில், ஒருவரை போலீஸாா் மடக்கிப் பிடித்து பாலூா் காவல் நிலையத்தில் ஒப்படைத்தனா்.
போலீஸாா் நடத்திய விசாரணையில் பிடிபட்ட நபா் ராஜஸ்தான் மாநிலத்தைச் சோ்ந்த பிரதீப் (24) என்பதும், காரில் 500 கிலோ குட்கா புகையிலைப் பொருள்களைக் கடத்தி வந்ததும் தெரிய வந்தது.
இதையடுத்து, குட்கா மற்றும் கடத்தலுக்குப் பயன்படுத்திய காரை போலீஸாா் பறிமுதல் செய்தனா். தப்பிச் சென்ற இருவரை போலீஸாா் தேடி வருகின்றனா்.
