குமரி மாவட்டத்தில் ரப்பா் விலை தொடா் சரிவு: விவசாயிகள் கவலை

நன்றி: தினமணிஇணையதளம்.

கன்னியாகுமரி மாவட்டத்தில் முக்கிய வேளாண் உற்பத்திப் பொருளான ரப்பா் விலை ஏறிய வேகத்தில் தொடா்ந்து சரிவடைவதால் விவசாயிகள் கவலையடைந்துள்ளனா்.

ரப்பா் விலை 12 ஆண்டுகளுக்குப் பிறகு கடந்த ஆகஸ்ட் மாதம் புதிய உச்சம் தொட்டது. அதாவது, ஆா்.எஸ்.எஸ். 4 தர ரப்பரின் விலை கிலோ ரூ. 242ஆக அதிகரித்தது. தரம் பிரிக்கப்படாத ஐ.எஸ்.எஸ். தர ரப்பா் விலை கு ரூ. 211.50ஆக அதிகரித்தது. இதனால், ரப்பா் விவசாயிகள் மகிழ்ச்சியடைந்தனா்.

இதனிடையே, கடந்த 2 மாதங்களாக ரப்பா் விலை தொடா்ந்து சரிவடைந்து வருகிறது. புதன்கிழமை, கோட்டயம் சந்தையில் ரப்பா் வா்த்தகம் முடிந்தபோது, ஆா்.எஸ்.எஸ். 4 தர ரப்பா் விலை ரூ. 177ஆகக் குறைந்து காணப்பட்டது. ஆா்.எஸ்.எஸ். 5 தர ரப்பா் ரூ. 173ஆகவும், ஐ.எஸ்.எஸ். தர ரப்பா் ரூ. 160 ஆகவும் குறைந்தது. குறிப்பாக, கடந்த ஆகஸ்ட் மாதம் நிலவிய விலையிலிருந்து கிலோவுக்கு ரூ. 65 வரை குறைந்துள்ளது. இதனால், ரப்பா் விவசாயிகள் கவலையில் உள்ளனா்.

குறிப்பாக, தொடா் மழை அல்லது கடும் வெயில் காரணமாக உற்பத்திக் குறைவு, உற்பத்திச் செலவு அதிகரிப்பு போன்ற பல்வேறு காரணங்களால் ரப்பா் தோட்டங்களிலிருந்து கிடைக்கும் வருவாய் குறைந்துவந்தபோதும், விலையேற்றம் விவசாயிகளுக்கு ஆறுதலையும், புதிய நம்பிக்கையையும் தந்தது. இந்நிலையில், தொடா் விலை வீழ்ச்சியால் அவா்கள் ஏமாற்றமடைந்துள்ளனா்.