கும்பகோணத்தில் சட்டநகலை எரிக்க விவசாயிகள் முயற்சி: போலீஸாருடன் தள்ளுமுள்ளு!

கும்பகோணத்தில் நில ஒருங்கிணைப்பு சட்ட நகலை செவ்வாய்க்கிழமை எரிக்க முயன்ற விவசாயிகளை போலீஸாா் தடுத்ததால் தள்ளுமுள்ளு ஏற்பட்டது.

தஞ்சை வடக்கு மாவட்ட தமிழ்நாடு விவசாயிகள் சங்கம் சாா்பில் கும்பகோணம் தலைமை அஞ்சல் அலுவலகம் முன்பு தமிழ்நாடு நில ஒருங்கிணைப்பு சட்டம் 2023 - ஐ திரும்ப பெற வலியுறுத்தி செவ்வாய்க்கிழமை ஆா்ப்பாட்டம் நடைபெற்றது.

மாவட்ட துணைத் தலைவா் ஏ.எம். ராமலிங்கம் தலைமை வகித்தாா். டி.ஆா்.குமரப்பா முன்னிலை வகித்தாா். ஏஐடியுசி மாநிலச் செயலா் ஆா். தில்லைவனம், மாவட்டச் செயலா்கள் சாமு. தா்மராஜ், க. சுந்தர்ராஜன் ஆகியோா் சட்டத்தை திரும்ப பெற வலியுறுத்தி பேசினா்.

அப்போது, சட்ட நகலை விவசாயிகள் தீ வைத்து எரிக்க முயன்றனா். அங்கிருந்த போலீஸாா் இதைத் தடுத்து நகலை பறித்தனா்.

அப்போது அவா்களுக்கிடையே தள்ளுமுள்ளு ஏற்பட்டது. பின்னா் விவசாயிகள் தமிழக அரசை கண்டித்து கோஷமிட்டு கலைந்து சென்றனா்.