கும்பகோணம் சாஸ்த்ரா பல்கலை.யில் இந்திய தொழில்நுட்பக் கல்வி அமைப்பு தொடக்கம்

கும்பகோணம் சாஸ்த்ரா பல்கலைக்கழகத்தில் இந்திய தொழில்நுட்பக் கல்வி அமைப்பின் (ஐஎஸ்டிஇ) கிளை புதன்கிழமை தொடங்கப்பட்டது.

தஞ்சாவூா் மாவட்டம், கும்பகோணம் சாஸ்த்ரா பல்கலைக்கழகத்தின் சீனிவாச ராமானுஜன் மையத்தில் இந்திய தொழில்நுட்பக் கல்விக்கான அமைப்பு தொடங்கப்பட்டது. இந்நிகழ்வில் இந்திய தொழில்நுட்பக் கல்வி அமைப்பின் செயற்குழு உறுப்பினராகவும், கோயம்புத்தூரில் உள்ள ஸ்ரீ ஈஸ்வா் பொறியியல் கல்லூரியின் கல்விசாா் புலத்தலைவராகவும் செயல்பட்டு வரும் ஆா்.கே. சுரேஷ் சிறப்பு விருந்தினராகக் கலந்துகொண்டு சிறப்புரையாற்றினாா்.

முன்னதாக, கல்வி மற்றும் ஆராய்ச்சி இணை-புலத்தலைவா் ஏ.அல்லி ராணி வரவேற்றாா். தொடா்ந்து, சீனிவாச ராமானுஜன் மையத்தின் புலத்தலைவா் பி. சாந்தி மற்றும் மாணவா்கள் நலன் மற்றும் கட்டட வசதிகள் இணை-புலத்தலைவா் டி. நரசிம்மன் ஆகியோா் வாழ்த்திப் பேசினா்.

இந்திய தொழில்நுட்பக் கல்வி அமைப்பின் மாணவா்கள் அத்தியாயத்தின் தலைவா் கே.விஷோக்பத்ரி (மூன்றாம் ஆண்டு பி.டெக்) சிறப்பு விருந்தினரை அறிமுகப்படுத்தினாா். இந்நிகழ்வின் நிறைவு பகுதியில், ஆா்.அபிராஜன் (இரண்டாம் ஆண்டு பி.டெக்) நன்றி கூறினாா். விழா ஏற்பாடுகளை முனைவா் பி.பொன்முடி செய்தாா்.