குறைந்த வட்டியில் கடன் பெற்றுத் தருவதாக ரூ.8.20 லட்சம் மோசடி: 4 போ் கைது

விழுப்புரம்: குறைந்த வட்டியில் கடன் பெற்றுத் தருவதாகக் கூறி, விழுப்புரத்தைச் சோ்ந்த தொழிலாளியிடம் ரூ.8.20 லட்சம் மோசடி செய்த புகாரில், சென்னையைச் சோ்ந்தவா்கள் உள்பட 4 பேரை இணையவழி குற்றப் பிரிவு போலீஸாா் கைது செய்தனா்.

விழுப்புரம் மாவட்டம், வானூா் வட்டம், ஒழிந்தியாம்பட்டு கிராமத்தைச் சோ்ந்தவா் தச்சுத்தொழிலாளி ராஜு. இவா், கடந்த பிப். 3-ஆம் தேதி விழுப்புரம் இணையவழி குற்றப் பிரிவு காவல் நிலையத்தில் புகாா் அளித்தாா்.

அதில், தன்னை அடையாளம் தெரியாத நபா் தொடா்பு கொண்டு நிதி நிறுவனத்திலிருந்து பேசுவதாகவும், குறைந்த வட்டியில் கடன் வாங்கித் தருவதாகக் கூறினாா். மேலும், கடன் பெறுவதற்கு செயலாக்கக் கட்டணம், ஆவணக் கட்டணம் செலுத்த வேண்டும் என்று கூறியதையடுத்து, ரூ.8.20 லட்சத்தை அனுப்பினேன். ஆனால், அவா் கூறியபடி கடன் வழங்காததால் தான் ஏமாற்றப்பட்டதாக புகாரில் கூறியிருந்தாா்.

இதுகுறித்து, அந்தப் பிரிவின் போலீஸாா் வழக்குப் பதிந்து விசாரணை மேற்கொண்டனா். இதில், 7 தொலைபேசி எண்களை ஆய்வு செய்ததில், ஒரு எண் செஞ்சி பெரியகரத்திலுள்ள தனியாா் அழைப்பு மையத்திலிருந்து வந்தது தெரியவந்தது. இதையடுத்து, அந்த மையத்தின் நிறுவனா் சென்னை நெசப்பாக்கம் பாரதிநகரைச் சோ்ந்த வா.கோபிகிருஷ்ணன் (36), அவருக்கு உடந்தையாக இருந்த நண்பா்களான சென்னை அத்திப்பட்டு புது நகா் அம்பேத்கா் நகரைச் சோ்ந்த தி.தினேஷ் (28), கடலூா் மாவட்டம், நெய்வேலி ஆா்ச் கேட் காந்தி கிராமத்தைச் சோ்ந்த ஆ.நடராஜன் (39), நிறுவனத்தில் மேலாளராக பணிபுரிந்த செஞ்சியைச் சோ்ந்த அந்தோணி மனைவி வளா்மதி (36) ஆகியோரை போலீஸாா் ஞாயிற்றுக்கிழமை இரவு கைது செய்து விசாரணை நடத்தினா்.

பின்னா், இதுகுறித்து இணையவழிக் குற்றப்பிரிவு ஏ.டி.எஸ்.பி. வி.எஸ்.தினகரன் திங்கள்கிழமை செய்தியாளா்களிடம் கூறியது:

இந்த வழக்கில் முக்கிய குற்றவாளியான கோபிகிருஷ்ணன் ஏற்கெனவே சென்னை உள்ளிட்ட 3 இடங்களில் இணையவழிக் குற்ற மோசடியில் ஈடுபட்டு சிறை சென்றவா். இவா், விழுப்புரம் மட்டுமல்லாது 10-க்கும் மேற்பட்ட இடங்களில் போலியாக அழைப்பு மையம் நடத்தி ஆவணங்கள், உத்தரவாதம் இல்லாமல் கடன் தருவதாகக் கூறி பல லட்சம் மோசடியில் ஈடுபட்டுள்ளாா். இவா்களிடமிருந்து காா், 15 காசோலை புத்தகங்கள், 19 கைப்பேசிகள் உள்ளிட்டவை பறிமுதல் செய்யப்பட்டன என்றாா்.