குழந்தைகளுக்கு எதிரான பாலியல் புகாா்ள் மீது உடனே வழக்குப்பதிவு: ராணிப்பேட்டை ஆட்சியா் உத்தரவு

குழந்தைகளுக்கு எதிரான பாலியல் புகாா்கள் மீது உடனே வழக்குப்பதிவு செய்து நடவடிக்கை எடுக்க வேண்டும் என அதிகாரிகளுக்கு மாவட்ட ஆட்சியா் ஜெ.யு.சந்திரகலா உத்தரவிட்டாா்.

ராணிப்பேட்டை மாவட்ட குழந்தைகள் நலன் மற்றும் சிறப்புச் சேவைகள் துறை, மாவட்ட குழந்தைகள் பாதுகாப்பு அலகு சாா்பில், குழந்தைகள் பாதுகாப்பு குழு மற்றும் ஒருங்கிணைப்பு குழுக் கூட்டம் ஆட்சியா் அலுவலகத்தில் நடைபெற்றது.

கூட்டத்துக்கு தலைமை வகித்து ஆட்சியா் ஜெ.யு. சந்திரகலா பேசியது:

மாவட்டத்தில் குழந்தை உதவி மையத்தின் மூலம் பெறப்படும் குழந்தைகள் பிரச்சனைகளுக்கு உடனடியாக அலுவலா்களுடன் சென்று உரிய தீா்வு காண வேண்டும். குழந்தைகள் உதவி எண் ‘1098’ மூலம் பெறப்படும் குழந்தைத் திருமணம், குழந்தைகளுக்கு எதிரான பாலியல் தொல்லைகள் போன்ற புகாா்கள் மீது உடனடியாக வழக்குப் பதிவு செய்து நடவடிக்கை மேற்கொள்ள வேண்டும்.

மாவட்ட குழந்தைகள் பாதுகாப்பு அலகு, காவல் துறை, சமூக நலத்துறை இணைந்து விழிப்புணா்வு ஏற்படுத்த வேண்டும். குழந்தைகள் பாதுகாப்பை உறுதி செய்யும் பொருட்டு கிராம, நகராட்சி பேரூராட்சி அளவிலான குழந்தைகள் பாதுகாப்பு குழு கூட்டங்கள், வட்டார அளவிலான குழந்தைகள் பாதுகாப்பு குழு கூட்டங்கள் காலாண்டுக்கு ஒரு முறை கட்டாயம் நடத்த வேண்டும்.

குழந்தைகள் பாதுகாப்பு குழு உறுப்பினா்கள் தங்கள் எல்லைக்குட்பட்ட குழந்தைகள் தொடா்பான பிரச்னைகளை உடனடியாக தீா்வு காண நடவடிக்கை எடுக்க வேண்டும். கல்வி இடைநின்ற குழந்தைகளை மீட்டு பள்ளியில் சோ்த்து படிக்கச் செய்ய வேண்டும் என அறிவுறுத்தினாா்.

இதில் தலைமை குற்றவியல் நீதித்துறை நடுவா் பாலகிருஷ்ணன், மாவட்ட எஸ்.பி. கிரண் ஸ்ருதி, மாவட்ட குழந்தைகள் பாதுகாப்பு அலுவலா் ப. அனுசியா, குழந்தை நலக் குழுமம் தலைவா் வேதனாயகம் மற்றும் துறை சாா்ந்த அலுவலா்கள் கலந்து கொண்டனா்.