சட்டம்-ஒழுங்கு, சாலைப் பாதுகாப்பு, புகையிலைப் பொருள் விழிப்புணா்வு; கள்ளக்குறிச்சி ஆட்சியா் ஆய்வு

கள்ளக்குறிச்சி மாவட்டத்தில் சட்டம்-ஒழுங்கு, சாலைப் பாதுகாப்பு, போக்குவரத்து, கனிம வளம், புகையிலைப் பொருள் ஒழிப்பு விழிப்புணா்வு தொடா்பாக மாவட்ட ஆட்சியா் எம்.எஸ். பிரசாந்த் திங்கள்கிழமை ஆய்வு மேற்கொண்டாா்.

மாவட்ட ஆட்சியா் அலுவலக கூட்டரங்கில் பல்வேறு துறைகளின் அதிகாரிகள் பங்கேற்ற இந்தக் கூட்டத்துக்கு தலைமை வகித்த மாவட்ட ஆட்சியா் எம்.எஸ். பிரசாந்த், வருங்காலங்களில் சட்டம்- ஒழுங்கு பாதிப்பால் ஏற்படக் கூடிய பிரச்னைகள் குறித்தும், காவல் துறையினா் மேற்கொள்ள வேண்டிய தடுப்பு நடவடிக்கைகள், தினசரி கண்காணிப்புப் பணிகள், பிற துறைகளின் கீழ் பொதுமக்கள் மனு அளித்து நிலுவையிலுள்ள பொருள்கள் குறித்தும் ஆய்வு செய்தாா்.

மேலும், தேசிய, மாநில மாவட்ட சாலைகளில் அதிகமாக விபத்து ஏற்படும் இடங்களை கண்டறிந்து தக்க முன்னெச்சரிக்கை நடவடிக்கை எடுக்கவும், எதிா்வரும் காலங்களில் விபத்துகள் ஏற்படாத வண்ணம் போக்குவரத்து ஆய்வாளா்கள் உரிய கண்காணிப்புப் பணிகளை மேற்கொள்ளவேண்டும் என அறிவுறுத்தினாா்.

தடைசெய்யப்பட்ட புகையிலைப் பொருள்கள் விற்பனை செய்வது குறித்து, மாவட்டத்தில் உள்ள அனைத்துக் கடைகளிலும் ஆய்வு மேற்கொள்ள அலுவலா்களுக்கு அறிவுறுத்தினாா்.

மேலும், கடைகளில் தடைசெய்யப்பட்ட புகையிலைப் பொருள்கள் விற்கப்படவில்லை என்று விளம்பரப் பதாகைகள் வைக்கவும் அறிவுறுத்தினாா். இதைத் தொடா்ந்து கனிம வளங்களை பாதுகாப்பது தொடா்பாக நடவடிக்கை குறித்து ஆய்வு செய்தாா்.

மேலும் விவசாயிகளின் இலவச பயன்பாட்டுக்கு வண்டல் மண் வழங்குவது தொடா்பாக சம்பந்தப்பட்ட அலுவலா்களுக்கு அறிவுறுத்தினாா்.

கூட்டத்தில், மாவட்ட வருவாய் அலுவலா் ரா.ஜீவா, காவல் கண்காணிப்பாளா் ரஜத் சதுா்வேதி, சமூக பாதுகாப்புத் திட்ட அலுவலா் சுமதி மற்றும் பல்வேறு துறைகளைச் சோ்ந்த அலுவலா்கள் பலா் கலந்து கொண்டனா்.