சபா்மதி ஆசிரம மறுசீரமைப்பு திட்டத்துக்கு எதிரான மனு: உச்சநீதிமன்றம் நிராகரிப்பு

குஜராத்தில் உள்ள சபா்மதி ஆசிரம மறுசீரமைப்புத் திட்டத்துக்கு எதிராக மகாத்மா காந்தியின் கொள்ளுப் பேரன் துஷாா் காந்தி தாக்கல் செய்த மனுவை உச்சநீதிமன்றம் செவ்வாய்க்கிழமை நிராகரித்தது.

கடந்த 1917-ஆம் ஆண்டு குஜராத் மாநிலம் அகமதாபாதில் சபா்மதி ஆசிரமத்தை மகாத்மா காந்தி நிறுவினாா். இந்த ஆசிரமத்தை ரூ.1,200 கோடி செலவில் மறுசீரமைக்க குஜராத் அரசு மேற்கொண்ட முடிவுக்கு எதிராக மாநில உயா்நீதிமன்றத்தில் துஷாா் காந்தி மனு தாக்கல் செய்தாா்.

எனினும், மறுசீரமைப்புத் திட்டத்தால் ஆசிரமத்தின் பிரதான பகுதிக்கு எந்த பாதிப்பும் ஏற்படாது என்று மாநில அரசு அளித்த உத்தரவாதத்தை ஏற்று, அந்த வழக்கை 2022-ஆம் ஆண்டு உயா்நீதிமன்றம் முடித்துவைத்தது.

இதையடுத்து உயா்நீதிமன்ற தீா்ப்புக்கு எதிராக உச்சநீதிமன்றத்தில் துஷாா் காந்தி மேல்முறையீடு செய்தாா். அந்த மனுவில், ‘செல்வத்தை குவித்துவைப்பதைத் தடுக்க வேண்டும் என்று வலியுறுத்தும் அரசமைப்புச் சட்டப் பிரிவு 39, நினைவுச் சின்னங்கள் மற்றும் தேசிய முக்கியத்துவம் வாய்ந்த இடங்களைப் பாதுகாக்க வேண்டும் என்று வலியுறுத்தும் அரசமைப்புச் சட்டப் பிரிவு 49 ஆகியவற்றுக்கு எதிராக சபா்மதி ஆசிரம மறுசீரமைப்புத் திட்டம் உள்ளது.

இந்தத் திட்டத்தின் கீழ், பெரும் முதலீடுகள் மூலம் சபா்மதி ஆசிரமத்தை பொழுதுபோக்கு பூங்காவாக மாற்ற திட்டமிடப்படுகிறது. இதன் மூலம், மகாத்மா காந்தி கற்பித்த பாடங்கள் ஏளனம் செய்யப்படுகின்றன.

மறுசீரமைப்புத் திட்ட பணிகளுக்குத் தடை விதிக்க வேண்டும்’ என்று கோரினாா்.

எனினும் குஜராத் உயா்நீதிமன்றத் தீா்ப்புக்கு எதிராக மிகவும் தாமதமாக இரண்டரை ஆண்டுகளுக்குப் பிறகு துஷாா் காந்தி மேல்முறையீட்டு மனு தாக்கல் செய்துள்ளாா் என்றும் அந்த மனுவில் தலையிட விரும்பவில்லை என்றும் தெரிவித்து, அவரின் மனுவை உச்சநீதிமன்ற நீதிபதிகள் எம்.எம்.சுந்தரேஷ், ராஜேஷ் பிந்தல் ஆகியோா் அடங்கிய அமா்வு செவ்வாய்க்கிழமை நிராகரித்தது.