'அது குடும்ப பிரச்னை, அதனால்...'- பாமக உட்கட்சி விவகாரம் குறித்து கார்த்தி சிதம்...
கிருஷ்ணகிரி: கிருஷ்ணகிரி மாவட்டத்தில் சமையல் உதவியாளா் பணிக்கு விண்ணப்பம் செய்தோருக்கு சான்றிதழ் சரிபாா்க்கும் பணி திங்கள்கிழமை நடைபெற்றது.
கிருஷ்ணகிரி மாவட்டத்தில் பள்ளிகளின் சத்துணவு மையங்களில் காலியாக உள்ள 732 சமையல் உதவியாளா் பணியிடங்களுக்கு விண்ணப்பங்கள் வரவேற்கப்பட்டன. அதன்படி, வட்டார அளவில் காலியாக உள்ள பணியிடங்கள், அந்தந்த வட்டார வளா்ச்சி அலுவலகம் மற்றும் நகராட்சி அறிவிப்பு பலகையில் பாா்வைக்கு காட்சிப்படுத்தப்பட்டது.
சமையல் உதவியாளா் பணிக்கு, 18 முதல் 40 வயதுக்கு உள்பட்ட பெண்கள் விண்ணப்பிக்கலாம் எனத் தெரிவிக்கப்பட்டது. மாவட்டம் முழுவதும், 3,500-க்கும் மேற்பட்ட பெண்கள் சமையல் உதவியாளா் பணிக்கு விண்ணப்பித்தனா். அவா்களில் தகுதியானோரின் விண்ணப்பங்கள் ஏற்கப்பட்டு, சான்றிதழ் சரிபாா்ப்புப் பணி வட்டார வளா்ச்சி அலுவலகங்களில் நடைபெற்றன.
கிருஷ்ணகிரி வட்டத்தில், 62 அரசுப் பள்ளிகள் உள்ளிட்ட பள்ளிகளில் காலியாக உள்ள 65 சமையல் உதவியாளா் பணியிடங்களுக்கு 364 போ் விண்ணப்பித்தனா். இவா்களில் 188 பேரின் மனுக்கள் ஏற்றுக்கொள்ளப்பட்டன. பிற மனுக்கள் தள்ளுபடி செய்யப்பட்டன. முதல்நாளில் 100 பேரின் சான்றிதழ்கள் சரிபாா்க்கப்பட்டன. செவ்வாய்க்கிழமையும் இந்தப் பணி நடைபெற உள்ளது.
உதவி திட்ட அலுவலா் ரமேஷ் தலைமையில் நடைபெற்ற சான்றிதழ் சரிபாா்ப்புப் பணியில் கிருஷ்ணகிரி, வட்டார வளா்ச்சி அலுவலா் உமாசங்கா் உள்ளிட்டோா் கலந்துகொண்டனா். இந்தப் பணி நிறைவடைந்தவுடன், சமையல் உதவியாளா் பணிக்கு தோ்வு செய்யப்பட்டோா் பட்டியலை மாவட்ட ஆட்சியா் ச.தினேஷ்குமாா் வெளியிடுவாா் என அலுவலா்கள் தெரிவித்தனா்.
