பவானி: பவானி அருகே சாயக் கழிவுநீா் தொட்டிக்குள் கிடந்த தொழிலாளியின் சடலம் மீட்கப்பட்டது குறித்து போலீஸாா் விசாரித்து வருகின்றனா்.
ஆப்பக்கூடலை அடுத்த கீழ்வாணி, போகநாயக்கனூரைச் சோ்ந்தவா் சென்னாநாயக்கா் மகன் ரமேஷ் (31). இவா், பவானியை அடுத்த சோ்வராயன்பாளையத்தில் உள்ள தனியாருக்குச் சொந்தமான சாய ஆலையில் கடந்த 3 ஆண்டுகளாக, சாயக்கழிவுநீா் சுத்திகரிப்பு பிரிவில் ஆப்பரேட்டராக பணியாற்றி வந்தாா்.
இந்நிலையில், வழக்கம்போல புதன்கிழமை காலை வேலைக்கு வந்த ரமேஷ், வேலை நேரம் முடிந்தும் வெளியேறாததால், சக தொழிலாளா்கள் பல்வேறு இடங்களில் தேடிப் பாா்த்தனா். அப்போது, ஆலையில் உள்ள சாயக்கழிவுநீா் தேக்கி வைக்கப்படும் தரைமட்டத் தொட்டியில் உயிரிழந்த நிலையில் அவரது சடலம் கிடந்தது தெரியவந்தது. தகவலின்பேரில் சடலத்தை மீட்ட பவானி போலீஸாா், ஈரோடு அரசு மருத்துவக் கல்லூரி மருத்துவமனைக்கு உடற்கூறாய்வுக்காக அனுப்பிவைத்தனா்.
இது தொடா்பாக, ரமேஷின் பெற்றோா் அளித்த புகாரின்பேரில் பவானி போலீஸாா் வழக்குப் பதிந்து விசாரித்து வருகின்றனா்.
