சிரியா கிளா்ச்சிப் படை - ஆயுதக் குழுவினா் மோதல்

டமாஸ்கஸ்: சிரியாவில் முன்னாள் அதிபா் அல்-அஸாத் ஆதரவுப் படையினருக்கும் ஆட்சியை புதிதாகக் கைப்பற்றியிருக்கும் கிளா்ச்சிப் பைடயினருக்கும் இடையிலான மோதலில் 17 போ் உயிரிழந்தனா்.

இது குறித்து, அந்த நாட்டின் போா் விவகாரங்களைக் கண்காணித்துவரும் சிரியா மனித உரிமைகள் கண்காணிப்பு அமைப்பு வெளியிட்டுள்ள அறிக்கையில் குறிப்பிடப்பட்டுள்ளதாவது:

சிரியாவில் முன்னாள் அதிபா் அல்-அஸாத் ஆட்சிக் காலத்தில் சிறைச்சாலை கொடுமைகளுக்குக் காரணமானவா் என்று குற்றஞ்சாட்டப்படும் முகமது காஞ்சோ ஹஸன் என்ற முன்னாள் அதிகாரியைக் கைது செய்வதற்காக தற்போதைய அரசின் உள்துறை அமைச்சகத்தைச் சோ்ந்த படையினா் டாா்டஸ் நகருக்குச் சென்றனா். அல்-அஸாதின் அலாவி சமூகத்தினா் பெரும்பான்மையாக வசிக்கக் கூடிய அந்த நகரில், இந்நடவடிக்கைக்கு கடும் எதிா்ப்பு எழுந்தது.

கைது செய்ய வந்திருந்த கிளா்ச்சிப் படையினருக்கு எதிராக, அங்கிருந்த ஆயுதக் குழுவினா் தாக்குதல் நடத்தினா்.

அதையடுத்து இரு தரப்பினருக்கும் இடையே நடைபெற்ற மோதலில், ஹயாத் தஹ்ரீா் அல்-ஷாம் (ஹெச்டிஎஸ்) கிளா்ச்சிப் படையைச் சோ்ந்த 14 பேரும், அல்-அஸாத் ஆதரவுப் படையைச் சோ்ந்த மூன்று பேரும் உயிரிழந்தனா்; 10 போ் காயமடைந்தனா்.

கிளா்ச்சிப் படையினா் தேடிச் சென்ற முகமது காஞ்சோ ஹஸன், சேத்னயா சிறைச் சாலையில் கைதிகளுக்கு எதிராக நடைபெற்ற கொடுமைகளுக்கு காரணமானவா்; ஏராளமான கைதிகளை படுகொலை செய்ய அவா்தான் உத்தரவிட்டாா் என்று அந்த அறிக்கையில் குறிப்பிடப்பட்டுள்ளது.

கடந்த 2011-ஆம் ஆண்டு தொடங்கிய சிரியா உள்நாட்டுப் போரில் ரஷியா மற்றும் ஈரான் உதவியுடன் நாட்டின் மிகப் பெரும்பான்மையான பகுதிகளை அல்-அஸாத் தலைமையிலான ராணுவம் மீட்டது. பின்னா் கிளா்ச்சியாளா்களுடன் போா் நிறுத்த ஒப்பந்தம் மேற்கொள்ளப்பட்டதைத் தொடா்ந்து, உள்நாட்டுச் சண்டை நீண்ட காலமாகவே தேக்கமடைந்திருந்தது.

இந்த நிலையில், அரசுப் படைகளுக்கு எதிராக ஹெச்டிஎஸ் தலைமையில் கிளா்ச்சிப் படையினா் கடந்த மாத இறுதியில் திடீரென தாக்குதல் நடத்தி வெகுவேகமாக முன்னேறி தலைநகா் டமாஸ்கஸை கடந்த 8-ஆம் தேதி கைப்பற்றினா். ஆட்சியை இழந்த அதிபா் அல்-அஸாத் தனது குடும்பத்தினருடன் ரஷியா தப்பிச் சென்றாா்.

அல்-அஸாத் அரசு அகற்றப்பட்டதற்குப் பிறகு, டமாஸ்கஸில் அமைந்துள்ள, ‘மனித கசாப்புக் கூடம்’ என்று அழைக்கப்படும் சேத்னயா சிறையிலிருந்த கைதிகளை கிளா்ச்சிப் படையினா் விடுவித்தனா்.

அந்தச் சிறைச் சாலையில் அல்-அஸாத் அரசுக்கு எதிரானவா்கள் அடைத்துவைக்கப்பட்டு துன்புறுத்தப்பட்டு படுகொலை செய்யப்பட்டதாகக் குற்றஞ்சாட்டப்படுகிறது.

இந்த நிலையில், சேத்னயா சிறைச் சாலை முக்கிய அதிகாரியைக் கைது செய்ய முயன்றபோது ஏற்பட்ட மோதலில் 17 போ் உயிரிழந்தது, புதிய அரசு எதிா்நோக்கியிருக்கும் மிகப் பெரிய சவால்களை உணா்த்துவதாகக் கூறப்படுகிறது.