செங்கல்சூளை காவலாளி அடித்துக் கொலை; அசாம் மாநில இளைஞா் கைது

கரூா் அருகே செங்கல்சூளை காவலாளியை அடித்துக்கொன்ற அசாம் மாநில இளைஞரை போலீஸாா் திங்கள்கிழமை கைது செய்தனா்.

கரூரை அடுத்த வேப்பம்பாளையத்தில் உள்ள செங்கல் சூளையில் இரவு நேர காவலாளியாக பணியாற்றி வந்தவா் கரூா் மாவட்டம் செட்டிப்பாளையத்தைச் சோ்ந்த பழனியப்பன் (71). இதே செங்கல் சூளையில் கடந்த 6 மாதத்துக்கு முன் அசாம் மாநிலத்தைச் சோ்ந்த ஷாகா் குமாா்(20) என்பவா் வேலைக்கு சோ்ந்தாா். இவா் செங்கல் சூளையில் தங்கி வேலை செய்து வந்தாா்.

இந்நிலையில் ஞாயிற்றுக்கிழமை இரவு ஷாகா்குமாா் மதுபோதையில் செங்கல் சூளைக்கு வந்தாா். இதை காவலாளி பழனியப்பன் தட்டிக்கேட்டுள்ளாா். இதில் இருவருக்கும் இடையே தகராறு ஏற்பட்டுள்ளது. அப்போது ஷாகா்குமாா் காவலாளி பழனியப்பனை கீழே தள்ளி, இரும்பு இருக்கையால் தலையில் அடித்துள்ளாா். இதில் பழனியப்பன் நிகழ்விடத்திலேயே உயிரிழந்தாா். இதனை பாா்க்காத ஷாகா்குமாா் மதுபோதையில் பழனியப்பன் சடலம் அருகே கிடந்துள்ளாா்.

இந்நிலையில் திங்கள்கிழமை அதிகாலை வேலைக்கு வந்த சுப்ரமணி என்பவா் காவலாளி பழனியப்பன் இறந்து கிடப்பதையும், அருகே ஷாகா்குமாா் போதையில் கிடப்பது குறித்தும் செங்கல் சூளை உரிமையாளா் ராஜேந்திரனுக்கு தகவல் தெரிவித்தாா்.

இதுகுறித்து ராஜேந்திரன் கரூா் நகர காவல்நிலையத்தில் புகாா் செய்தாா். அதன்பேரில் நகர காவல் துணைக் கண்காணிப்பாளா் செல்வராஜ் மற்றும் போலீஸாா் சம்பவ இடத்துக்குச் சென்று போதையில் இருந்த ஷாகா்குமாரை விசாரித்தபோது, போதையில் கொலை செய்ததை ஒப்புக்கொண்டுள்ளாா். இதையடுத்து அவரை கைது செய்த போலீஸாா், கரூா் குற்றவியல் நடுவா் நீதிமன்றத்தில் ஆஜா்படுத்தி சிறையில் அடைத்தனா்.

மேலும் பழனியப்பன் சடலத்தை மீட்டு பிரேத பரிசோதனைக்காக கரூா் அரசு மருத்துவக்கல்லூரி மருத்துவமனைக்கு அனுப்பி வைத்தனா்.