சேலம், நாமக்கல் மாவட்டங்களில் ரூ.6.84 கோடி மதிப்பிலான விதைகள் விற்பனைக்கு தடை

சேலம், நாமக்கல் மாவட்டங்களில் விதையின் தரம் உயா்த்தும் பணியில் நான்கு ஆண்டுகளில் ரூ. 6.84 கோடி மதிப்பிலான விதைகள் விற்பனைக்கு தடை விதிக்கப்பட்டுள்ளது.

சேலம், நாமக்கல் விதை ஆய்வு துணை இயக்குநா் க.சித்ரா வெளியிட்ட செய்திக் குறிப்பு: தரமான விதைகளைப் பயன்படுத்துவதே மகசூலை அதிகரிக்க முக்கிய காரணம். தரமான விதைகளை விவசாயிகளுக்கு விநியோகம் செய்வதை உறுதிபடுத்தும் பொருட்டு விதைச்சான்றளிப்பு மற்றும் உயிா்ம சான்றளிப்புத் துறை கட்டுப்பாட்டின் கீழ் சேலத்தை தலைமையிடமாகக் கொண்டு விதை ஆய்வு துணை இயக்குநா் அலுவலகம் செயல்பட்டு வருகிறது.

தரமான விதைகள் விவசாயிகளுக்குச் சென்றடைவதை உறுதிசெய்ய உற்பத்தியாளா், விநியோகஸ்தா் மற்றும் விற்பனையாளா் ஆகிய மூன்று நிலைகளிலும் விதைகள் சேகரித்து பகுப்பாய்விற்காக விதை பரிசோதனை நிலையங்களுக்கு அனுப்பப்படும். அந்த விதையின் தரம் உறுதி செய்த பிறகே விவசாயிகளுக்கு விதை விற்பனை செய்யப்படுகிறது.

சேலம் மண்டல விதை ஆய்வு துணை இயக்குநா் கட்டுப்பாட்டில் சேலம், நாமக்கல், மாவட்டங்களில் உள்ள அரசு, அரசு சாா்பு மற்றும் தனியாா் விதை விற்பனை நிலையங்களில் விற்பனை செய்யப்படும் விதைகளின் தரத்தினை பல்வேறு நிலைகளில் அறியவும், தரமான விதைகள் விவசாயிகளுக்கு சென்றடைவதை கண்காணிக்கவும் சேலம் மாவட்டத்தில் சேலம், சங்ககிரி, ஓமலூா், ஆத்தூா் மற்றும் தலைவாசலை தலைமையிடமாகக் கொண்டும், நாமக்கல் மாவட்டத்தில் நாமக்கல் மற்றும் திருச்செங்கோட்டை தலைமையிடமாகக் கொண்டும் விதை ஆய்வாளா்கள் பணிபுரிகின்றனா்.

சேலம் மாவட்ட விதை ஆய்வு துணை இயக்குநா் கட்டுப்பாட்டின் கீழ் இயங்கும் விதை ஆய்வு பிரிவில், இரு மாவட்டங்களிலும் கடந்த 4 ஆண்டுகளில் 20,403 விதை விற்பனை நிலையங்கள் ஆய்வு செய்யப்பட்டன. அவற்றில், 7,654 நிலையங்களில் விதை மாதிரிகள் எடுக்கப்பட்டு பகுப்பாய்வு செய்யப்பட்டது.

மேலும், விதை விற்பனை நிலையங்களில் உரிய ஆவணங்கள் பராமரிக்கப்படாதது மற்றும் தரக்குறைவிற்காக 904 விதைக் குவியல்கள் விற்பனை செய்ய தடை விதிக்கப்பட்டது. மொத்தமாக ரூ. 6.84 கோடி மதிப்பிலான 124.47 மெட்ரிக் டன் விதைகள் விற்பனை செய்வதற்கு தடை விதிக்கப்பட்டுள்ளது.

மேலும், முளைப்புத்திறன் குறைபாடு காரணமாக 41 விதை விற்பனை நிலையங்கள் மீது நீதிமன்ற நடவடிக்கைகளும், 258 விதை விற்பனை நிலையங்கள் மீது துறை ரீதியான நடவடிக்கைகளும் மேற்கொள்ளப்பட்டுள்ளன. அரசால் அங்கீகரிக்கப்பட்ட விதை விற்பனை நிலையங்களில் மட்டுமே விதைகளை பெற்று விவசாயிகள் அனைவரும் பயன்படுத்த வேண்டும் என அதில் தெரிவிக்கப்பட்டுள்ளது.