தகாத உறவு காரணமாக தலை துண்டித்து மனைவி, ஆண் நண்பா் கொலை - கணவா் போலீஸில் ஒப்படைப்பு

கள்ளக்குறிச்சி அருகே தகாத உறவு காரணமாக மனைவி, அவரது ஆண் நண்பரை தலை துண்டித்து கொலை செய்த கணவா், அவா்களது தலைகளுடன் வேலூா் மத்திய சிறைக்கு சரணடையச் சென்றாா். அங்கு, பாதுகாப்புப் பணியிலிருந்த போலீஸாா் அவரை பிடித்து பாகாயம் காவல் நிலைய போலீஸாரிடம் ஒப்படைத்தனா்.

கள்ளக்குறிச்சியை அடுத்த மலைக்கோட்டாலம் கிராமத்தைச் சோ்ந்தவா் கொளஞ்சி (60). இவரது இரண்டாவது மனைவி லட்சுமி (42). தம்பதிக்கு 3 பெண் பிள்ளைகள் உள்ளனா். மனைவியின் நடத்தையில் சந்தேகமடைந்த கொளஞ்சி, அவரை கண்டித்து வந்தாா்.

இந்த நிலையில், புதன்கிழமை இரவு லட்சுமி வீட்டு மொட்டை மாடியில் அதே கிராமத்தைச் சோ்ந்த தங்கராசுவுடன் (62) தனிமையில் இருந்ததாகத் தெரிகிறது. இதை நேரில் பாா்த்து ஆத்திரமடைந்த கொளஞ்சி, கொடுவாளால் இருவரது தலைகளையும் துண்டாக வெட்டியதில்,

லட்சுமி, தங்கராசு ஆகியோா் நிகழ்விடத்திலேயே உயிரிழந்தனா். இதையடுத்து, இருவரது தலைகளையும் பையில் போட்டுக்கொண்டு கொளஞ்சி அங்கிருந்து தப்பிச் சென்றாா்.

இதுகுறித்து அந்தப் பகுதி மக்கள் வரஞ்சரம் காவல் நிலையத்துக்கு தகவல் தெரிவித்தனா். இதையடுத்து, கள்ளக்குறிச்சி மாவட்ட கூடுதல் எஸ்.பி. தி.சரவணன், கள்ளக்குறிச்சி டி.எஸ்.பி. செ.தங்கவேல், காவல் ஆய்வாளா் ம.ராபின்ஸன் மற்றும் போலீஸாா் நிகழ்விடத்துக்குச் சென்று பாா்வையிட்டு விசாரணை நடத்தினா். மேலும், விரல்ரேகைகள், தடயங்கள் சேகரிக்கப்பட்டன. மோப்பநாயும் வரவழைக்கப்பட்டது.

தலைகளுடன் வேலூா் சென்ற கொளஞ்சி: கொளஞ்சி பையில் வைத்திருந்த தனது மனைவி லட்சுமி, அவரது ஆண் நண்பா் தங்கராசு ஆகியோரின் தலைகளுடன் வேலூா் மத்திய சிறைக்கு வியாழக்கிழமை காலை சரணடையச் சென்றாா். அங்கு பாதுகாப்புப் பணியிலிருந்த போலீஸாா், அவரிடம் விசாரணை நடத்தி, உடனடியாக பாகாயம் காவல் நிலைய போலீஸாரிடம் ஒப்படைத்தனா்.

இதையடுத்து, பாகாயம் காவல் நிலைய போலீஸாா் அளித்த தகவலின்பேரில், தியாகதுருகம் காவல் ஆய்வாளா் மலா்விழி, கச்சிராயபாளையம் காவல் உதவி ஆய்வாளா் இரா.ஆனந்தராசு மற்றும் போலீஸாா் அங்கு சென்று கொளஞ்சியை கைது செய்து அழைத்து வந்தனா்.