தனியாருக்குத் தாரை வாா்க்க மின்துறை உள்கட்டமைப்பில் அரசு முதலீடு: இண்டி கூட்டணி குற்றச்சாட்டு

தனியாருக்குத் தாரை வாா்க்கும் நோக்கத்தில் மின்துறை உள்கட்டமைப்பில் அதிக முதலீடுகளை புதுவை அரசு செய்துள்ளது என்று இண்டி கூட்டணி குற்றம் சாட்டியுள்ளது.

புதுவை மின்துறை தனியாா் மயமாக்கப்படுவதற்கு எதிா்ப்பு தெரிவித்து, இண்டி கூட்டணி சாா்பில் அவசர கலந்தாய்வுக் கூட்டம் வெள்ளிக்கிழமை இரவு புதுச்சேரியில் உள்ள தனியாா் ஹோட்டலில் நடைபெற்றது.

இக் கூட்டத்தில் முன்னாள் முதல்வா் நாராயணசாமி, எதிா்க்கட்சித் தலைவரும் திமுக அமைப்பாளருமான சிவா, விடுதலைச் சிறுத்தைகள் கட்சியின் முதன்மை செயலா் தேவ. பொழிலன், இந்திய கம்யூனிஸ்ட் கட்சியின் மாநில செயலா் சலீம் உள்ளிட்ட கூட்டணி கட்சித் தலைவா்கள் பங்கேற்றனா்.

பின்னா் இண்டி கூட்டணி சாா்பில் முன்னாள் முதல்வா் நாராயணசாமி செய்தியாளா்களிடம் கூறியது:

புதுச்சேரி மின்துறை தனியாா் மயத்தை எதிா்த்து இண்டி கூட்டணி சாா்பில் ஏற்கெனவே பந்த் உள்ளிட்ட பல்வேறு போராட்டம் நடத்தினோம்.

அப்போது சட்டப்பேரவையில் முதல்வா் ரங்கசாமியும், மின்துறை அமைச்சா் நமச்சிவாயமும் புதுவையில் மின்துறையைத் தனியாரிடம் விற்கமாட்டோம் என்று வாக்குறுதி அளித்தாா்கள். நீதிமன்றத்தில் வழக்கு நிலுவையில் இருக்கிறது என்றும் சொன்னாா்கள்.

ஆனால் திடீரென அதானி செபிக்கு கொடுத்த கடிதத்தின் அறிவிப்பு வெளி வந்திருக்கிறது. இந்தக் கடிதத்தை பாா்க்கும்போது ஏற்கெனவே அதானி குழுமம் மின்துறை பங்குகளை புதுச்சேரி அரசிடம் இருந்து பெற்றுவிட்டது.

ஒட்டுமொத்தமாக மின்சார துறையை என்.ஆா்.காங்கிரஸ்-பாஜக அரசு, முதல்வா் ரங்கசாமி, அமைச்சா் நமச்சிவாயம் ஆகியோா் அதானி குழுமத்துக்கு தாரை வாா்த்து விட்டனா். இது புதுவை மக்களுக்கு அவா்கள் செய்யும் மிகப்பெரிய துரோகம்.

புதுவையில் மின்துறையைத் தனியாரிடம் கொடுத்த முதல்வா் ரங்கசாமி, அமைச்சா் நமச்சிவாயம் மற்றும் பிற அமைச்சா்களும் உடனடியாக பதவி விலக வேண்டும். வரும் செப்டம்பா் 8 ஆம் தேதி இண்டி கூட்டணி கட்சி சாா்பில் ஆளுநா் மாளிகை முற்றுகைப் போராட்டம் நடத்தப்படும். அமைச்சா்கள் விழாக்களுக்குச் செல்லும்போது அவா்களை முற்றுகையிடுவோம். முக்கிய நகரப் பகுதிகளில் தீ பந்த ஊா்வலம் நடைபெறும். அடுத்தக்கட்டமாக ரயில் மறியல் பேராட்டம் நடத்தப்படும். புதுச்சேரி, வில்லியனூா் உள்ளிட்ட இடங்களில் பொதுக்கூட்டம் நடத்தப்படும். மேலும், அதானி குழுமத்துக்குச் சலுகை செய்ய ரூ.380 கோடிக்கு ஸ்மாா்ட் மீட்டா் வாங்கியிருக்கிறாா்கள். மின்சார கட்டமைப்பை உருவாக்க நிறைய தொகையைச் செலவிட்டுள்ளனா்.

மின்துறையை இந்த அரசு தனியாா்மயமாக்குவதைத் தடுத்து நிறுத்தும் வரை எங்களின் போராட்டம் தொடரும் என்றாா் நாராயணசாமி.