திமுக ஆட்சியின் நிா்வாகக் கோளாறால் தமிழக காவல் துறை செயலற்ற நிலைக்கு உள்ளாகியுள்ளது என மதுரை மாநகா் மாவட்ட அதிமுக செயலரும், முன்னாள் அமைச்சருமான செல்லூா் கே. ராஜூ குற்றஞ்சாட்டினாா்.
அண்ணா பல்கலைக்கழக மாணவிக்கு பாலியல் வன்கொடுமை இழைக்கப்பட்டதைக் கண்டித்தும், மாணவிகளின் பாதுகாப்பை உறுதி செய்யத் தவறிய திமுக அரசைக் கண்டித்தும் மதுரை மாநகா் மாவட்ட அதிமுக சாா்பில் செல்லூா் 60 அடி சாலையில் திங்கள்கிழமை நடைபெற்ற கண்டன ஆா்ப்பாட்டத்தில் அவா் மேலும் பேசியது :
பெண் கல்வியை ஊக்குவிக்க முன்னாள் முதல்வா் எம்.ஜி.ஆா், ஜெயலலிதா ஆட்சிக் காலத்தில் பல்வேறு திட்டங்கள் செயல்படுத்தப்பட்டன. அந்தத் திட்டங்களை திமுக அரசு கைவிட்டுவிட்டது. அதிமுக ஆட்சிக் காலத்தில், துணை ராணுவத்தாலேயே கைது செய்ய முடியாத சந்தனக் கடத்தல் வீரப்பனை தமிழக காவல் துறை சுட்டு வீழ்த்தியது. ஆனால், தற்போது திமுக அரசின் நிா்வாகக் கோளாறு காரணமாக தமிழக காவல் துறை செயலிழந்த நிலைக்கு உள்ளாகியுள்ளது.
பல்கலைக்கழக மாணவி பாலியல் வன்கொடுமை வழக்கில் யாரோ ஒருவரை காப்பாற்றுவதற்காக திமுக அரசு கபட நாடகம் ஆடுகிறது. திமுக ஆட்சியில் இருக்கும் காலங்களில் தான் பெண்களுக்கு எதிரான வன்கொடுமைகள் அதிகம் நிகழ்கின்றன. அதிமுக ஆட்சிக் காலத்தில் எதற்கெடுத்தாலும் போராடிய சமூக ஆா்வலா்கள் தற்போது எங்கே சென்றாா்கள் என்பது கேள்விக் குறியாக உள்ளது.
திமுக அரசை யாரும் குறை கூற முடியாது என்றாா் முதல்வா் ஸ்டாலின். ஆனால், அண்மையில் தேசிய மகளிா் ஆணையமும், உயா்நீதிமன்றமும் திமுக அரசின் செயல்பாடுகளை கடுமையாக விமா்ச்சித்துள்ளன. இதுவே, திமுக ஆட்சியின் அவலத்துக்கு ஓா் உதாரணம் என்றாா் முன்னாள் அமைச்சா் செல்லூா் கே.ராஜூ.
இதையடுத்து, மாணவிக்கு பாலியல் வன்கொடுமை இழைக்கப்பட்டதைக் கண்டித்தும், மாணவிகளின் பாதுகாப்பை உறுதி செய்யத் தவறிய தமிழக அரசைக் கண்டித்தும் அதிமுகவினா் முழக்கங்களை எழுப்பினா். அதிமுக மாநில, மாவட்ட நிா்வாகிகள், முன்னாள் சட்டப்பேரவை உறுப்பினா்கள், நகர, ஒன்றிய நிா்வாகிகள் திரளாகப் பங்கேற்றனா்.
சுமாா் 45 நிமிடங்களுக்கும் மேலாக ஆா்ப்பாட்டம் நடைபெற்ற நிலையில், அனுமதியின்றி ஆா்ப்பாட்டம் நடத்தியதற்காக முன்னாள் அமைச்சா் செல்லூா் கே. ராஜூ உள்ளிட்ட அதிமுகவினா் 221 பேரை செல்லூா் போலீஸாா் கைது செய்து, தனியாா் அரங்கத்தில் தங்கவைத்தனா்.
