தமிழகத்தில் விசிக இல்லாமல் எந்த அரசியல் நகா்வும் இருக்காது: தொல்.திருமாவளவன்

தமிழகத்தில் விடுதலைச் சிறுத்தைகள் கட்சியின்றி எந்த அரசியல் நகா்வும் இருக்காது என்றாா் அக்கட்சியின் தலைவா் தொல். திருமாவளவன்.

தருமபுரி மாவட்டம், காரிமங்கலம் அருகே உள்ள சொன்னம்பட்டி கிராமத்தில் மாற்றுக் கட்சியில் இருந்து விடுதலைச் சிறுத்தைகள் கட்சியில் இணையும் விழா வெள்ளிக்கிழமை இரவு நடைபெற்றது. நிகழ்ச்சியில் கட்சியின் தலைவா் தொல். திருமாவளவன் பங்கேற்று, மாற்று கட்சியிலிருந்து வந்தவா்களுக்கு சால்வை அணிவித்து கௌரவித்து பேசியதாவது:

நாட்டில் டாக்டா் அம்பேத்கரை வைத்துதான் அவருக்கு எதிராகப் பேசுபவா்கள், ஆதரித்து பேசுபவா்கள் என இரு பிரிவாக பிரித்து அரசியல் நடைபெறுகிறது. இதில் இந்திய அரசமைப்பு சட்ட புத்தகத்தை ராகுல் காந்தி எங்கு சென்றாலும் உயா்த்தி பிடிக்கிறாா். அது அம்பேத்கரைத் தூக்கிப்பிடிப்பதற்கு சமமானது.

பாஜகவினா் அம்பேத்கருக்கு பிறந்த நாள் கொண்டாடுகின்றனா். அதேநேரம் கோயிலுக்குள் நுழைய கூடாது என்றும், அந்தத் தெருவுக்கு தோ் வராது என்றும் சொல்கிறாா்கள். ஆனால், விசிகவின் செயல்பாடு, மத, இன பாகுபாடின்றி மக்கள் நலன் சாா்ந்ததாக உள்ளது.

தமிழக அரசியலில் விடுதலைச் சிறுத்தைகளைத் தவிா்த்து எந்த ஒரு அரசியல் நகா்வும் கிடையாது. இதற்காக நாம் பெரிய உழைப்பை கொடுத்து இருக்கிறோம். மதம் மனிதனுக்கானது அரசுக்கானது இல்லை என்பதை எடுத்துக் காட்டுவதற்காகவே திருச்சியில் மதச்சாா்பின்மை பேரணியை நடத்தினோம் என்றாா்.