தவெக. தலைவா் விஜய் சுற்றுப்பயணத்தால் அதிமுகவுக்கு எந்த பாதிப்பும் இல்லை: முன்னாள் அமைச்சா் கே.டி. ராஜேந்திர பாலாஜி

தவெக தலைவா் விஜய் சுற்றுப் பயணத்தால் அதிமுகவுக்கு எந்த பாதிப்பும் இல்லை என முன்னாள் அமைச்சா் கே.டி. ராஜேந்திர பாலாஜி தெரிவித்தாா்.

விருதுநகா் அருகே உள்ள வள்ளியூரில் அதிமுகவின் 53- ஆவது ஆண்டு விழாவையொட்டி கட்சி கொடியை ஞாயிற்றுக்கிழமை ஏற்றி வைத்து அவா் பேசியதாவது:

திமுக ஆட்சியில் மாணவிகளுக்கு பாதுகாப்பு இல்லை. பாலியல் வன்கொடுமை குற்றவாளிகள் திமுகவின் போா்வையில் ஒளிந்து கொள்கின்றனா். பொதுமக்களுக்கு பொங்கல் பரிசாக ரூ. 1000 வழங்காமல் திமுக அரசு ஏமாற்றுகிறது. திமுக ஆட்சிக்கு எதிராக மக்களின் மனநிலை உருவாகிவிட்டது. பட்டாசு தொழில் பாதுகாப்பாக இல்லாததற்கு திமுக அரசே காரணம் என்றாா் அவா்.

இதைத் தொடா்ந்து அவா் செய்தியாளா்களிடம் கூறியதாவது: திமுக கூட்டணி சிதறு தேங்காய் போல உடையும் சூழல் உருவாகிவிட்டது. மாா்க்சிஸ்ட் கம்யூனிஸ்ட் கட்சியின் தலைவா்களின் ஒருவரான பாலகிருஷ்ணன், தமிழகத்தில் அவசர நிலை பிரகடனம் செய்யப்பட்டிருப்பதாக கூறியுள்ளாா்.

திமுக ஆட்சியை ஆதரிப்பவா்களும் தற்போது எதிா்க்கின்றனா். திமுக பொதுச் செயலரும், அமைச்சருமான துரைமுருகன் வீட்டில் அமலாக்கத்துறை சோதனை நடத்தியது அரசியல் பழிவாங்கும் நடவடிக்கையாக இருந்தால், அது வருந்தத்தக்கது.

வருகிற சட்டப் பேரவைத் தோ்தலில் 200 தொகுதிகளில் அதிமுக வெற்றி பெறும். தவெக தலைவரும், நடிகருமான விஜய் சுற்றுப் பயணத்தால் அதிமுகவுக்கு எந்த பாதிப்பும் இல்லை. விஜய்யின் வருகையால் திமுகவின் வாக்குகள் தான் பிரியும் என்றாா் அவா்.