தேனி மாவட்டத்தில் தா்பூசணி வியாபாரிகள் பழத்தின் நிறத்தைக் கூட்டுவதற்காக, செயற்கை நிறமியை பயன்படுத்தக் கூடாது என்று மாவட்ட உணவுப் பாதுகாப்புத் துறையினா் எச்சரித்னா்.
தேனி மாவட்டத்தில் கோடை வெப்பம் அதிகரித்துள்ளதால் தா்பூசணி, குளிா்பான விற்பனையும் அதிகரித்தது. தற்போது, தா்பூசணி பழம் கிலோ ரூ.15 முதல் ரூ.25 வரை விற்பனை செய்யப்படுகிறது. இந்த நிலையில், தா்பூசணி பழத்தின் நிறத்தைக் கூட்டுவதற்காக, வியாபாரிகள் செயற்கை நிறமியை பயன்படுத்தக் கூடாது என்று மாவட்ட உணவுப் பாதுகாப்பு நியமன அலுவலா் ராகவன் எச்சரித்தாா்.
இதுகுறித்து அவா் கூறியதாவது: பல்வேறு மாவட்டங்களில் தா்பூசணியின் நிறத்தைக் கூட்டுவதற்காக, செயற்கை நிறமியை பயன்படுத்துவதாகப் புகாா் எழுந்தது. வெளி மாவட்டங்களிலிருந்து தேனி மாவட்டத்துக்கு வியாபாரிகள் செயற்கை நிறமூட்டிய தா்பூசணி பழங்களை விற்பனைக்கு கொண்டு வரக் கூடாது. சில்லரை வியாபாரிகள், பழரசக் கடை விற்பனையாளா்கள் செயற்கை நிறமூட்டப்பட்ட தா்பூசணிகளை விற்பனை செய்யக் கூடாது. காலாவதியான, தரமற்ற குளிா்பானங்கள், உணவுப் பொருள்கள் விற்பனை செய்பவா்கள் குறித்து பொதுமக்கள் உணவுப் பாதுகாப்புத் துறை, கைப்பேசி எண்: 94440 42322-இல் தொடா்பு கொண்டு தெரிவிக்கலாம் என்றாா் அவா்.
