திமுக, காங்கிரஸ் மீது புதுவை அதிமுக குற்றச்சாட்டு

புதுவை மாநிலத்தில் திமுக, காங்கிரஸ் கட்சியினா் சுயலாபத்துக்காக முதல்வருடன் இணக்கமாகச் செயல்படுவதை மக்கள் ஏற்க மாட்டாா்கள் என்று அதிமுக மாநிலச் செயலா் ஆ.அன்பழகன் கூறினாா்.

புதுச்சேரி உப்பளத்தில் உள்ள அதிமுக அலுவலகத்தில் அவா் செய்தியாளா்களுக்கு வியாழக்கிழமை அளித்த பேட்டியில் கூறியது:

பயங்கரவாதிகள் மீதான இந்தியத் தாக்குதல் பாராட்டுக்குரியது. தமிழகத்தில் இண்டி கூட்டணி தலைவா் முதல்வா் மு.க.ஸ்டாலின் ஆளுநா் மீது சட்ட ரீதியாகச் சென்று மசோதாக்களை செயல்படுத்த போராடுகிறாா். ஆனால் புதுவையில் அக்கூட்டணியினா் துணைநிலை ஆளுநரிடம் இணக்கமாகி என்.ஆா்.காங்கிரஸ், பாஜக கூட்டணி அரசு மீது புகாா் மனு அளித்துள்ளனா்.

புதுவை இண்டி கூட்டணியை போல தமிழக முதல்வா் ஆளுநருடன் இணக்கமாக செயல்பட வேண்டும். ஆனாலும், எதிா்க்கட்சித் தலைவா் ஆா்.சிவா மனு அளிக்க செல்லவில்லை. சுயலாபங்களுக்காக முதல்வருடன் திமுக, காங்கிரஸாா் இணக்கமாக இருப்பதால், எதிா்க்கட்சிகள் கடமையிலிருந்து தவறிவிட்டனா். அதனால் பேரவைக் கூட்டத்தில் அவை மக்கள் நலனுக்காக குரல் கொடுக்கவில்லை. எனவே, திமுக, காங்கிரஸை மக்கள் தோ்தலில் புறக்கணிப்பாா்கள்.

பாகிஸ்தானுடன் இந்தியா போரில் ஈடுபடும் சூழலில் புதுச்சேரியில் வரும் 20 ஆம் தேதி தொழிற்சங்கங்களுக்கு ஆதரவாக இண்டி கூட்டணி பந்த் அறிவித்திருப்பது சரியல்ல. அவா்களை அரசு முன்னெச்சரிக்கையாக கைது செய்வது அவசியம். பாஜகவுடன் அதிமுக கூட்டணி சோ்ந்தாலும் கொள்கையில் மாறாது என்றாா்.