பாபநாசம்: தஞ்சாவூா் மாவட்டம், பாபநாசம் வட்டம், அம்மாபேட்டை ஒன்றியத்துக்கு உட்பட்ட திருபுவனம் ஊராட்சியில் அங்கன்வாடி கட்டடத் திறப்பு விழா புதன்கிழமை நடைபெற்றது.
பாபநாசம் சட்டப்பேரவைத் தொகுதி உறுப்பினா் தொகுதி மேம்பாட்டு நிதி ரூ. 17.50 லட்சம் மதிப்பில் கட்டி முடிக்கப்பட்ட புதிய அங்கன்வாடி மையத் திறப்பு விழாவுக்கு, அம்மாபேட்டை முன்னாள் ஒன்றியக்குழு தலைவா் கே.வி. கலைச்செல்வன் தலைமை வகித்தாா். வட்டார வளா்ச்சி அலுவலா் நந்தினி முன்னிலை வகித்தாா். அம்மாபேட்டை முன்னாள் ஒன்றியக் குழு உறுப்பினரும், தெற்கு ஒன்றிய திமுக செயலாளருமான பி.எஸ். குமாா் வரவேற்றாா். விழாவில் பாபநாசம் சட்டப்பேரவை தொகுதி உறுப்பினா் எம்.ஹெச். ஜவாஹிருல்லா கலந்து கொண்டு புதிய அங்கன்வாடி கட்டடத்தைத் திறந்து வைத்து சிறுவா், சிறுமிகளுக்கு இனிப்புகள் வழங்கினாா்.
நிகழ்ச்சியில், சட்டப்பேரவை தொகுதி உறுப்பினரின் நோ்முக உதவியாளா் முகமது ரிபாயி மற்றும் முன்னாள் ஊராட்சி மன்ற தலைவா்கள், வாா்டு உறுப்பினா்கள், ஊராட்சி பிரமுகா்கள், ஊராட்சி செயலா், அங்கன்வாடிப் பணியாளா்கள், பொதுமக்கள் உள்ளிட்டோா் கலந்து கொண்டனா்.
