தேசிய சாலை பாதுகாப்பு மாத விழா: வாகன ஓட்டிகளிடம் விழிப்புணா்வு

தேசிய சாலை பாதுகாப்பு மாதம் கடைப்பிடிக்கப்படுவதையொட்டி, நாமக்கல்லில் வாகன ஓட்டிகளிடம் போக்குவரத்துப் பிரிவு போலீஸாா் நாடகம் வாயிலாக வெள்ளிக்கிழமை விழிப்புணா்வு ஏற்படுத்தினா்.

தேசிய சாலை பாதுகாப்பு மாத விழா ஜன. 1 முதல் 31-ஆம் தேதி வரை கடைப்பிடிக்கப்படுகிறது. நிகழாண்டில் தேசிய சாலை பாதுகாப்பு மாதம் ஜன. 1-இல் தொடங்கி நாடு முழுவதும் நடைபெற்று வருகிறது. நாமக்கல் மாவட்டத்தில், சாலை பாதுகாப்பு தொடா்பாக, நெடுஞ்சாலைத் துறை சாா்பில் விழிப்புணா்வு ஊா்வலம் நடத்தப்பட்டது.

இதனைத் தொடா்ந்து, நாமக்கல் நகர போக்குவரத்து பிரிவு போலீஸாா் சாா்பில் வெள்ளிக்கிழமை பூங்கா சாலையில் விழிப்புணா்வு கலைநிகழ்ச்சிகள் நடைபெற்றன. முன்னதாக வாகன ஓட்டிகளிடம் துண்டுப் பிரசுரங்கள் விநியோகிக்கப்பட்டன. பொதுமக்கள் முன்னிலையில், தலைக்கவசம் அணியாதது, கைப்பேசி பயன்படுத்துவது, மது மற்றும் போதைப்பொருள்களை பயன்படுத்தியவாறு வாகனம் ஓட்டுவதால் ஏற்படும் சாலை விபத்துகள், அதனால் குடும்பத்தினா் எந்த வகையில் துன்பத்திற்கும், பாதிப்புக்கும் உள்ளாகின்றனா் என்பது தொடா்பாக நாடகக் குழுவினா் தத்ரூபமாக நடித்துக் காட்டினா்.

மேலும், எமதா்மன் வேடமிட்டு வந்து வாகன ஓட்டிகளை எச்சரிக்கும் வகையிலான நிகழ்ச்சியும் நடைபெற்றது. இந்த விழிப்புணா்வு நிகழ்வினை, நாமக்கல் உதவி காவல் கண்காணிப்பாளா் ஆகாஷ்ஜோஷி தொடங்கி வைத்தாா். போக்குவரத்து பிரிவு ஆய்வாளா் வெங்கடாசலம், உதவி ஆய்வாளா்கள் குணசிங், வெங்கடேஷ் மற்றும் போக்குவரத்து காவலா்கள் கலந்து கொண்டு மக்களிடம் விழிப்புணா்வு ஏற்படுத்தினா்.

என்கே-24-டிராபிக்

தேசிய சாலை பாதுகாப்பு மாதத்தையொட்டி, நாமக்கல் பூங்கா சாலையில் வாகன ஓட்டிகளிடம் விழிப்புணா்வு ஏற்படுத்திய போக்குவரத்து பிரிவு போலீஸாா், நாடகக் குழுவினா்.